Ցրտահարությունից տուժած գյուղացիների հողի հարկը կփոխհատուցվի ամբողջությամբ. ջրի վարձը` 50 տոկսով

Հայաստանի կառավարությունը շուրջ 700 մլն դրամ հատկացրեց ցրտահարություններից տուժած գյուղացիական տնտեսությունների հողի հարկն ամբողջութամբ և ջրի վարձի 50 տոկոսը փոխհատուցելու համար: «Հանձնարարվել է բոլոր մարզպետարաններին կազմել ծրագրից օգտվող բոլոր շահառուների ցուցակները հրապարակել ջրպետկոմի և մարզպետարանների կայքէջերում, որպեսզի որևէ հարցադրում չլինի»,-ասաց ՀՀ փոխվարչապետի, տարածքային կառավարման նախարարի պաշտոնակատար Արմեն Գևորգյանը:

Ցրտահարություններից տուժած գյուղացիների օժանդակության ծրագրերը ներառվելու են նաև ՀՀ աշխատանքի և սոցիալական հարցերի նախարարության շրջանակներում: Մասնավորապես, նշված գերատեսչության ղեկավարի պաշտոնակատար Արտեմ Ասատրյանը նշեց, որ շարունակվելու է սեզոնային զբաղվածության ապահովման գծով աշխատանքը, ինչպես նախորդ տարի՝ Արմավիրի մարզում: Մասնավորապես, 2013 թվականին կարկտահարությունից տուժած Արմավիրի 630 գյուղացիական տնտեսությունների աշխատողների տրամադրվել է փոխհատուցում՝ մեկ օրվա աշխատավարձի տեսքով, որը կազմել է չորս հազար դրամ:

Արմեն Գևորգյանը հայտարարեց նաև, որ ընթացիկ տարում գյուղացիական տնտեսություններին գարու սերմացուն 200-ի փոխարեն տրամադրվելու է 130 դրամով: