ՍԴՀԿ ատենապետը կուտակային կենսաթոշակային համակարգը տեսնում է կամավորության սկզբունքով

Պարտադիր կուտակային կենսաթոշակային համակարգին անցնելը, Սոցիալ-դեմոկրատ հնչակյան կուսակցության վարչության ատենապետ Նարեկ Գալստյանի գնահատմամբ, ոչ միայն ժամանակավրեպ է, այլև խախտում է քաղաքացիների իրավունքները: Ապրիլի 10-ին լրագրողների հետ հանդիպման ժամանակ Նարեկ Գալստյանը նշեց, որ երկրում սոցիալական ճգնաժամը շատ խորն է և քաղաքացին վստահություն չունի իր ապագայի նկատմամբ: «Քաղաքացին իր ապագա մեկ տարվա նկա տմամբ վստահություն չունի, ուր մնաց 40 տարի ժամկետով»,- ասաց Գալստյանը' հավելելով, որ համակարգը պետք է լինի կամավորության սկզբունքով և միայն ցանկացողները գումար կուտակեն ապագայի համար: Անդրադառնալով Սահմանադրական դատարանի որոշմանը` Գալստյանը տեսակետ հայտնեց, որ այն տարընթերցման տեղիք է տալիս: «Եթե քաղաքացին դեմ է, սակայն նրանից շարունակում են գումար պահել, դա մարդու իրավունքների խախտում է»,- ասաց ՍԴՀԿ ատենապետը:

Նա դրական գնահատեց «Դ!եմ եմ» նախաձեռնության գործունեությունը' հավելելով, որ շարժման ակտիվիստները քաղաքական որևէ սադրանքի չեն ենթարկվում և հստակ իրենց ուղեգիծն են առաջ տանում: ՍԴՀԿ բազմաթիվ երիտասարդներ նույնպես դեմ են պարտադիր կուտակային կենսաթոշակային համակարգի ներդրմանն ու մասնակցում են բողոքի ակցիաներին:

ՀՀ Սահմանադրական դատարանը ապրիլի 2-ին հրապարակեց «Կուտակային կենսաթոշակների մասին» ՀՀ օրենքի 5, 7, 8, 37, 38, 45, 49 և 86-րդ հոդվածների սահմանադրականության վերաբերյալ Սահմանադրական դատարանի որոշումը: Որոշման համաձայն' Սահմանադրությանը հակասող ճանաչվեցին օրենքի հիշյալ դրույթները: