Հարյուրավոր մարդիկ Հռոմում Թուրքիայի դեսպանատան դիմաց նստացույցով աջակցություն են հայտնել քեսաբահայերին (լուսանկարներ)

Հարյուրավոր մարդիկ ամբողջ Իտալիայից ապրիլի 10-ին հավաքվել էին մասնակցելու Հռոմում Թուրքիայի դեսպանատան առաջ կազմակերված նստացույցին' իրենց բողոքի ձայնը բարձրացնելու Թուրքիայի ագրեսիվ քաղաքականության դեմ: Այս մասին Հռոմից «Արմենպրես»-ին տեղեկացրեց իտալա-արաբական «Ասսադակահ» կենտրոնի արտաքին հարցերի պատասխանատու, ռազմական լրագրող Թալալ Խրայիսը: Ցուցարարներն իրենց լիակատար աջակցությունն են հայտնել թուրքական հերթական ագրեսիայի զոհ դարձած հայերին, որ ստիպված են եղել լքել իրենց հայրենի քաղաք Քեսաբը' ապաստան գտնելով Լաթաքիայում և Բեյրութում:

«Մենք այստեղ ենք եկել դատապարտելու Թուրքիայի ռազմատենչ քաղաքականությունը Սիրիայի ինքնիշխան պետության դեմ: Թուրքիան բոլոր ժամանակներում եղել է պատերազմական պետություն: Պետք է նշեմ, որ մարտի 21-ին ուղիղ հարձակում է տեղի ունեցել Քեսաբ քաղաքի վրա, որի բնակչության մեծ մասը հայեր են… մենք այստեղ ենք նաև մեր համերաշխությունը հայտնելու հայ ժողովրդին»,- նշել է նստացույցի մասնակիցներից ակտիվիստ ԻլարիաԿանդիետը:

Նստացույցը կազմակերպել էր իտալա-արաբական «Ասսադակահ» կենտրոնը' «ո՛չ» ասելու Էրդողանի կառավարության ագրեսիվ քաղաքականությանը և նրա աջացկությանը Սիրիայի Քեսաբ քաղաքի դեմ իրականացված ահաբեկչական և ագրեսիվ գործողություններին:

Մարտի 21-ին Թուրքիայի սահմանի ութ կետերից հարձակումներ են սկսվել թուրք-սիրիական սահմանի մերձակայքում և Լաթաքիայի հյուսիսում գտնվող Քեսաբ գյուղաքաղաքի վրա: Ըստ ստացված տեղեկությունների` հարձակումն իրականացրել են «Ջաբհա ան Նուսր» և «Ջեյշ ալԻսլամ» ահաբեկչական խմբավորումները: Հարձակումների արդյունքում գյուղաքաղաքում գրեթե բնակիչներ չեն մնացել. նրանք ստիպված են եղել տեղափոխվել առավել ապահով վայրեր: Հայերի մեծամասնությունն ապաստան է գտել Լաթաքիայի Սուրբ Աստվածածին եկեղեցու տարածքի մոտ գտնվող ազգային կառույցներում: