«Վաքըֆլը գյուղի հայ բնակիչները հաշվեհամար են բացել քեսաբահայերի համար». «Ակոս»

Քեսաբի իրադարձությունների հետևանքով Թուրքիա եկած և հայկական Վաքըֆլը գյուղում հաստատված հայերին աջակցելու նպատակով գյուղի հայ բնակիչները հատուկ ուղերձ են հղել հանրությանը: Ինչպես հաղորդում է  հայկական «Ակոս» պարբերականը, ուղերձում նշվում է, որ քեսաբահայերի' Վաքըֆլը գալուն պես շատերն են պատրաստակամություն հայտնել օգնել և աջակից լինել նրանց:

«Մեր հյուրերի կարիքները շատ տարբեր են, անհրաժեշտ է յուրաքանչյուրի խնդրով հետաքրքրվել առանձին-առանձին: Այս պահին դեռևս հստակեցված չէ, սակայն խոսակցություն կա, որ մոտ ժամանակներս մի խումբ էլ կարող է բերվել: Եթե դա իրականություն դառնա, ապա մեր գործը փոքր-ինչ կբարդանա, սակայն մենք դրան էլ ենք նախապատրաստվում»,- նշվում է գյուղի բնակիչների տարածած հաղորդագրությունում: Թեպետ Վաքըֆլը գյուղում հաստատված քեսաբահայերի օրական ապրուստը հոգալու համար շատ մեծ գումարներ հարկավոր չեն, սակայն կան որոշակի ծախսեր, որոնք միայն գյուղի բնակիչներ ը չեն կարող հոգալ: Որպես օրինակ, առաջինը գյուղ բերված Թիթիզյան քույրերն են, ովքեր արդեն կապ են հաստատել Բեյրութի իրենց բարեկամների հետ: Սակայն նրանց մոտ հասնելու համար ինքնաթիռի տոմսը բավական թանկ է: Գյուղացիների հայտարարութան մեջ ասվում է, որ թեպետ իրենք դիմել են պատկան մարմիններին գումարային հատկացումներ ստանալու և քեսաբահայերի կարիքները հոգալու համար, այդուհանդերձ դրանց տրամադրումը կարող է հետաձգվել, իսկ գուցե նաև գումար կարող է ընդհանրապես չտրամադրվել: Հաշվի առնելով այն, որ իրենց մոտ հաստատված մյուս քեսաբահայերն էլ կարող են գտնե լ իրենց բարեկամներին և ցանկություն հայտնել մեկնել նրանց մոտ, այդ ծախսերը բավական էական են դառնում: Ուստի իրենք բացել են բանկային հաշիվ, որտեղ բոլոր ցանկացողները կարող են գումար հանգանակել Թուրքիայում գտնվող քեսաբահայերի համար: Հաղորդագրության մեջ նշվում է, որ կարևորը ոչ թե հանգանակվող գումարի չափն է, այլ աջակցելու ոգին ու պատրաստակամությունը:

Քեսաբահայերի համար բացված բանկային հաշվեհամարը հետևյալն է. Սուրբ Աստվածածին հայկական եկեղեցու հիմնադրամ, Գյուղատնտեսական բանկի (Ziraat Bankası) Սամանդաղի մասնաճյուղ, հաշվեհամարը` 33222327-5001:

Թուրքիայի Հաթայ նահանգում գտնվող Վաքըֆլըն երկրում մնացած միակ հայկական գյուղն է, որտեղ այսօր 35 տներում բնակվում են 135 հայ: Գյուղն ունի իր գյուղապետը, եկեղեցին, հյուրանոցն ու մշակույթի կենտրոնը: