ԱՄՆ-ն պատժամիջոցներով սպառնում է Ռուսաստանին. BBC

ԱՄՆ-ն կարող է նոր պատժամիջոցներ սահմանել Ռուսաստանի նկատմամբ, եթե Մոսկվան և Թեհրանը համաձայնագիր կնքեն ապրանքների դիմաց իրանական նավթի մատակարարումների վերաբերյալ: Այդ մասին հայտարարել է ԱՄՆ-ի ֆինանսների նախարար Ջեյկոբ Լյուն, տեղեկացնում է BBC-ն:

Լյուն Ռուսաստանի իր պաշտոնակցին՝ Անտոն Սիլուանովին, այդ մասին նախազգուշացրել է Վաշինգտոնում կայացած երկկողմ հանդիպմանը, որտեղ ընթանում է Արժույթի միջազգային հիմնադրամի և Համաշխարհային բանկի ղեկավար մարմինների նստաշրջանը:

ԱՄՆ-ի ֆիննախարարի խոսքով՝ Ռուսաստանի և Իրանի գործարքը կհակասի Թեհրանի հետ միջազգային բանակցորդների «վեցյակի» համաձայնագրին, ըստ որի՝ Իրանը խոստացել է սահմանափակել իր միջուկային ծրագիրն Արևմուտքի կողմից պատժամիջոցների մեղմացման դիմաց:

Ավելի վաղ Reuters գործակալությունը՝ վկայակոչելով իրադրությանը ծանոթ աղբյուրներ, հաղորդել է, որ Ռուսաստանը և Իրանն առաջընթացի են հասել ռուսական սարքավորումների դիմաց իրանական նավթի մատակարարման վերաբերյալ համաձայնագրի շուրջ բանակցություններում. գործարքի գումարը կարող է կազմել 20 մլրդ դոլար:

Հունվարին ԶԼՄ-ները հաղորդել էին, որ ՌԴ-ն և Իրանը քննարկում են ռուսաստանյան սարքավորումների և ապրանքների դիմաց Ռուսաստանին օրական մոտավորապես 500 հազար բարել իրանական նավթի մատակարարման հարցը: Ավելի ուշ Իրանի դեսպան Մեհդի Սանային հաստատել է բանակցությունների փաստը, հավելելով, որ խոսքն օրական մի քանի հարյուր հազար բարել նավթի մատակարարման մասին է:

Ռուսաստանում գործակալության աղբյուրը հայտնել է, որ Մոսկվան «իր կողմից պատրաստել է բոլոր փաստաթղթերը»: Նա հավելել է, որ պարտավորագրում նավթի վերջնական գնի շուրջ պայմանավորվածություն դեռևս ձեռք չի բերվել: Նրա խոսքով՝ քննարկվել է ռուսական ապրանքների դիմաց, ներառյալ մետաղներ և պարենամթերք, Իրանից նավթի մատակարարման տարբերակը: Ռազմական տեխնիկայի մատակարարման մասին համաձայնագրում չի խոսվում:

Բացի այդ, Reuters-ի աղբյուրն ասել է, որ գործարքի ընդհանուր գումարը, ինչպես սպասվում է, կկազմի 15-ից մինչև 20 միլիարդ դոլար: