Գյուղացիական տնտեսություններին ցուցաբերվող օժանդակությունը կլինի խիստ հասցեական

ՀՀ փոխվարչապետի, տարածքային կառավարման նախարարի պաշտոնակատար Արմեն Գեւորգյանի մոտ այսօր' ապրիլի 11-ին կայացած խորհրդակցությանը քննարկվեել են ՀՀ կառավարության ապրիլի 10-ի նիստում ընդունված՝ ցրտահարության հետեւանքով տուժած գյուղացիական տնտեսությունների աջակցության ծրագրերի իրականացմանը վերաբերող հարցեր: Մասնակցել են ՀՀ գյուղատնտեսության նախարարի պաշտոնակատար Սերգո Կարապետյանը, աշխատանքի եւ սոցիալական հարցերի նախարարի պաշտոնակատար Արտեմ Ասատրյանը, ՏԿՆ ջրային տնտեսության պետական կոմիտեի նախագահ Անդրանիկ Անդրեասյանը, ինչպես նաեւ Արարատի, Արմավիրի, Արագածոտնի եւ Կոտայքի մարզպետները:

Արձանագրվել է, որ ցուցաբերվող օժանդակությունը պետք է լինի խիստ հասցեական՝ հաշվի առնելով պատճառված վնասի ծավալները: Գյուղացիական տնտեսությունների աջակցության չափն ու եղանակը պետք է որոշվի տեղերում՝ տեղական եւ մարզային իշխանությունների հետ համատեղ, իսկ աջակցության տրամադրման վերաբերյալ համապատասխան որոշումները պետք է հաստատվեն ավագանու նիստերում: Շահառուների ցուցակները կհրապարակվեն նաեւ մար զպետարանների պաշտոնական կայքերում:

Պայմանավորվածություն է ձեռք բերվել, որ ջրօգտագործողների ընկերությունները նույնպես կկազմեն ոռոգման ջրի դիմաց 2014թ. վարձավճարների փոխհատուցման ծրագրի շահառուների ցուցակները, որոնք կհրապարակվեն նաեւ Ջրային տնտեսության պետական կոմիտեի կայքում:

Այնուհետեւ Արտեմ Ասատրյանը ներկայացրել է ՀՀ աշխատանքի եւ սոցիալական հարցերի նախարարության կողմից նախատեսվող օժանդակության ծրագրի առանձնահատկությունները: Նշվել է, որ մեկ շաբաթվա ընթացքում կհստակեցվեն ծրագրի իրականացման մեխանիզմները: Պայմանավորվածություն է ձեռք բերվել, որ առաջիկա օրերին «Զբաղվածության պետական ծառայություն» գործակալության տարածքային կենտրոնների եւ Գյուղացիական աջակցության մարզային կենտրոնների ներկայացուցիչների մասնակցությամբ հանդիպումներ կկազմակերպվեն՝ ծրագրի առանձնահատկություններն ու իրա կանացման մեխանիզմները ներկայացնելու համար:

Սերգո Կարապետյանը և մարզպետները ներկայացրել են գյուղացիական տնտեսություններին հասցված վնասի վերաբերյալ օպերատիվ տվյալները: Մարզպետները նաեւ հայտնել են, որ որոշ համայնքների կողմից առաջարկ է եղել նախատեսված ռեսուրսների շրջանակում այլ կարգի աջակցություն ցուցաբերել, մասնավորապես, հակակարկտային կայանքներ տեղակայել: Արմեն Գեւորգյանը նշել է, որ այս հարցում խնդիր չի տեսնում եւ առաջարկել է, որպեսզի նմանատիպ հարցերը քննարկվեն եւ որոշումներ ընդունվեն ավագանու նիստերում, որոնք էլ հիմք կհանդիսանան համապատասխան միջոցառումների իրականացման համար:

Մարզպետները տեղեկացրել են նաեւ, որ ներկայումս տեղերում բավականին ինտենսիվ աշխատանքներ են իրականացնում բանկային եւ վարկային կազմակերպությունները՝ գյուղացիական տնտեսությունների վարկային պարտավորությունների ուսումնասիրման եւ խնդիրների կարգավորման ուղղությամբ:

Անդրանիկ Անդրեասյանը ներկայացրել է գարնանային սելավային ջրերն ինքնահոս համակարգերի միջոցով տնտեսություններին հասցնելու նպատակով իրականացվող աշխատանքների ընթացքը:

Արմեն Գեւորգյանն ընդգծել է, որ աջակցության ծրագրերի պատշաճ իրականացման խնդիրը լինելու է կառավարության ամենօրյա ուշադրության կենտրոնում եւ խորհրդակցության մասնակիցներին առաջարկել է հետեւողական լինել, որպեսզի բոլոր աշխատանքները կատարվեն ժամանակին եւ ողջ ծավալով: Նա նաեւ առաջարկել է, որպեսզի Գյուղատնտեսության, Տարածքային կառավարման, Աշխատանքի եւ սոցիալական հարցերի նախարարությունների եւ մարզպետարանների աշխատակիցները տեղերում ներկայացնեն օժանդակության ծրագրերն ու պարզաբանեն աջակցության տրամադրման մեխանիզմները: