«Հալեպ» բարեսիրական ՀԿ-ն ևս դրամահավաք է արել քեսաբահայերին օգնելու համար

«Հալեպ» հայրենակցական բարեսիրական հասարակական կազմակերպությունը դրամահավաք է իրականացրել Լաթաքիայում ապաստան գտած քեսաբահայերի օգնության նպատակով: Հանգանակության արկղերում հավաքվել է 1 միլիոն 437 հազար 090 ՀՀ դրամ, 10 հազար 003,20 ռուբլի, 118,95 ԱՄՆ դոլար և 3 եվրո գումար: «Հալեպ» հայրենակցական կազմակերպության երիտասարդական հանձնաժողովի անդամ Դիանա Քարազյանը նշեց, որ դրամահավաքը տևել է մեկ շաբաթ: «Այսօր արդեն մենք ամփոփում ենք դրամահավաքի արդյունքները: Դրամահավաքը կազմակերպվել էր քաղաքի տարբեր հատվածներում տեղադրված արկղերի միջոցով»,-ասաց նա:

Հայ-ռուսական (սլավոնական) համալսարանի ռեկտորի խորհրդական Հռիփսիմե Մարգարյանի խոսքով' Սլավոնական համալսարանն առաջինն էր, որ հենց համալսարանի բակում կազմակերպեց մեծ ակցիա, որի շրջանակներում էլ հենց սկսվեց դրամահավաքը: «Ակցիան շարունակական է լինելու, արկղը մեզ մոտ դրված է եղել մի քանի օր: Նախաձեռնությանը միացել են ոչ միայն ուսանողները, այլև դասախոսական կազմը և այդ իսկ պատճառով մենք այս շաբաթվա ընթացքում ևս գումար կհավաքենք և կփոխանցենք մեր հայրենակիցներին»,- ասաց Մարգարյանը:

«Հալէպ» ՀԿ-ի արտաքին կապերի բաժնի տնօրեն Սարգիս Բալխյանն էլ նշեց, որ շատ կազմակերպություններ փորձել են աջակցել Քեսաբից Լաթաքիա տեղափոխված մեր հայրենակիցներին: ««Հայաստան» համահայկական հիմնադրամը 63-64 հազար դոլար է ուղարկել Դամասկոսում Հայաստանի դեսպանատուն, որպեսզի դեսպանատան միջոցով այդ գումարը տեղափոխվի Լաթաքիա' մարդասիրական օգնություն հատկացնելու նպատակով: Արամ Ա կաթողիկոսի աջակցությամբ 25 հազար դոլար ևս փոխանցվել է քեսաբահայերին, նույնքան գումար է հատկացր ել նաև կաթողիկե համայնքը»,-ասաց Բալխյանը:

Հավաքված գումարի 70 տոկոսը կհատկացվի Լաթաքիայում գտնվող մեր հայրենակիցներին, իսկ 30 տոկոսը Հայաստանում ապաստանած քեսաբահայերին: