Ձվի շուկայում Զատկին ընդառաջ դիտարկում կանցկացվի

Զատկի տոնին ընդառաջ Սննդամթերքի անվտանգության պետական ծառայությունը (ՍԱՊԾ) ձվի շուկայում դիտարկում կանցկացնի հանրապետության ողջ տարածքում: Այս մասին լրագրողների հետ հանդիպման ժամանակ տեղեկացրեց ՀՀ գյուղատնտեսության նախարարության Սննդամթերքի անվտանգության պետական ծառա յության աշխատակազմի ղեկավարի տեղակալ, ստուգումների պատասխանատու Դավիթ Ղուլյանը: «Առաջիկայում' Զատկի տոնին ընդառաջ, վերահսկողություն է իրականացվելու: Տնտեսավարողներին զգուշացնում ենք, որ տեխնիկական կանոնակարգին չհամապատասխանող ձվերի վաճառքը կկասեցնենք ու շուկայից կհանենք»,- ասաց նա' չհստակեցնելով, սակայն, դիտարկման ճշգրիտ օրը:

Պաշտոնյան ներկայացրեց ձվի շուկայում անցկացված վերջին երկու դիտարկումների արդյունքները: «Առաջին դիտարկման ժամանակ հայտնաբերվել ու շուկայից հանվել է 400 հատ ձու, երկրորդի ժամանակ'4860 հատ ձու, որոնք չեն համապատախանել տեխնիկական կանոնակարգին»,-ասաց Դավիթ Ղուլյանը: Նրա խոսքով, հիմնական խախտումները հայտնաբերվել են ներմուծված ձվերի խմբաքանակներում'ժամկետանց ու թերի մակնշմամբ ձվեր: «Այս տարի մինչ այս պահը ներմուծվել է 2 միլիոն 900 հազար ձու Բուլղարիայից, Իրանից, Ուկրաինայից, Բելառուսից»,-տեղեկացրեց պաշտոնյան:

Հարցին, թե հնարավոր չէ՞, արդյոք, սահմանափակել ներմուծվող ձվերի քանակը' կապված տեղական շուկայում գերարտադրության հետ, Դավիթ Ղուլյանը նշեց, որ օրենքով նման լիազորություններ չկան: «Օրենքով ոչ մի տեղ չկա, որ պետք է կանգնեցնենք դրսից ներկրումը, ի՞նչ օրենքով դադարեցնենք»,-ասաց նա:

ՍԱՊԾ ստուգումների պատասխանատու Դավիթ Ղուլյանը տեղեկացրեց նաև, որ պլանային ստուգումներ են իրականացրել նաև մայրաքաղաքի 11 մանկապարտեզում: Դրանցից 10-ում, որոնք եղել են քաղաքապետարանի վերահսկողության ներքո, ոչինչ չեն հայտնաբերել: «Մեկ մանկապարտեզում' Երևանի թիվ 53-րդ մանկապարտեզում, հայտնաբերվել է երեք խախտում' սանիտարահիգիենիկ պայմանների խախտում, ժամկետանց ձվի օգտագործում, ինչպես նաև օգտագործվող միսը չէր անցել անասնաբուժական ստուգում: Եղել է հանձնարարական' ուղղել հայտնաբերված խախտումները»,-ասաց Դավիթ Ղուլյանը: