Գյուղնախարարությունը կօժանդակի ձկնաբույծներին ջրի էկոնոմ ռեժիմի տեղադրման հարցում

ՀՀ գյուղատնտեսության նախարարությունը նախապատրաստում է Արարատյան դաշտավայրի ձկնաբուծական տնտեսություններին սուբսիդավորված տոկոսադրույքով վարկավորման նախագիծ, որը հնարավորություն կտա անցնել ջրի շրջանառության ավելի խնայողական ռեժիմների: Այդ մասին ապրիլի 14-ին հրավիրված ասուլիսում նշեց ՀՀ գյուղատնտեսության նախարարության անասնաբուծության և անասնաբուժության վարչության պետ Աշոտ Հովհաննիսյանը: «Գյուղատնտեսության նախարարությունը ներկայումս պատրաստում է Կառավարության որոշման նախագիծ, որպեսզի բոլոր ձկնաբուծական տնտեսությունները, որոնք գործում են Արարատյան դաշտում, հնարավորություն ունենան ստանալ վարկեր, որպեսզի ձկնաբուծական տնտեսությունները այդ վարկային միջոցների հաշվին իրենց տնտեսություններում կարողանան կիրառել կիսափակ կամ փակ ջրամատակարարման համակարգեր»,- նշեց Հովհաննիսյանը՝ հավելելով, որ Կառավարությունը կսուբսիդավորի վարկի տոկոսադրույքը:

Պաշտոնյան անդրադարձավ Արարատյան դաշտի արտեզյան ջրերի և ձկնաբուծական տնտեսությունների հետ կապված իրավիճակին: Նա հայտնեց, որ Արարատյան դաշտում գործում են 168 ձկնաբուծական տնտեսություններ, իսկ խորքային հորերի շահագործման ակտիվ թույլտվությունները որոշակիորեն հանգեցրել են արտեզյան ջրերի մակարդակի նվազման: Պաշտոնյան նշեց, որ մոնիթորինգի արդյունքում պարզվել է, որ մի շարք ձկնաբուծարաններում խորքային հորերի ջրի ծավալն ավելի շատ է, քան իրենց անհրաժեշտ է: «Նրանց պետք է վայրկյանում 20 լիտր ջուր, բայց իրենք փաստացի ստանում են 25-30 լիտր ջուր: Արդյունքում այդ 10 լիտր ավելորդ ջուրը կոնսերվացվեց, որովհետև դա իզուր տեղը պետք է դուրս գար և օգտագործվեր որպես դրենաժային համակարգ լցվող ջրեր»,- նշեց Հովհաննիսյանը՝ հավելելով, որ ամբողջ աշխարհում ջրի խնայողության նպատակով կիրառվում են ջրի շրջանառության կիսափակ և փակ ռեժիմներ: