Անհայտ կորած են համարվում հարավկորեական խորտակված լաստանավի գրեթե 300 ուղևորներ. «Ռյոնհապ»

Ըստ վերջին տվյալների՝ Հարավային Կորեայի ափերի մոտ «Սևոլ» մարդատար լաստանավի խորտակման հետևանքով գրեթե 300 մարդ անհայտ կորել է: Այս մասին հաղորդել է «Ռյոնհապ» լրատվական գործակալությունը՝ վկայակոչելով իշխանությունների ներկայացուցիչներին:

Վթարի պահին նավում եղել է 477 մարդ: Ավելի վաղ հաղորդվել էր, որ հաջողվել է փրկել նրանցից ավելի քան 350-ին: Սակայն այժմ իշխանությունները խոստովանել են, որ այս տեղեկատվությունը չի համապատասխանում իրականությանը: Այժմ անհայտ կորած է համարվում ավելի քան 290 ուղևոր և անձնակազմի անդամ: Պաշտոնապես հաստատված է երկու մարդու՝ նավում աշխատող մի կնոջ և ուսանող-ուղևորի մահը:

Հինգ ժամում, որ անցել է խորտակման պահից, հաջողվել է փրկել 180 մարդու: Կասկածներ կան, որ մնացած ուղևորները կարող էին արգելափակված լինել նավի ներսում: Բայց նաև հույս կա, որ խեղդվող մարդկանց վերցրել են մասնավոր նավեր:

Այժմ խորտակման վայրում ընթանում է որոնողական-փրկարարական գործողությունը: Դրանում գործի են դրված 34 ռազմանավ և քաղաքացիական նավ, ինչպես նաև 18 ուղղաթիռ:

«Սևոլ» մարդատար լաստանավն ապրիլի 16-ի առավոտյան խորտակվել է Հարավային Կորեայի հարավարևմտյան ափի մոտ: Շուրջ 6,8 հազար տոննա ընդհանուր տարողությամբ նավը ճանապարհորդություն էր կատարում Ինչհոն նավահանգստի և Չեջու կղզու միջև:

Կորեայի Հանրապետության նախագահ Փակ Կին Հեն կարգադրել է մոբիլիզացնել բոլոր առկա ուժերը և միջոցները երկրի ափերի մոտ աղետի ենթարկված լաստանավի ուղևորների և անձնակազմի անդամներին փրկելու համար, հաղորդել է «Ինտերֆաքսը»: