Ուկրաինայի հայերի միությունը երկրի իշխանություններից համարժեք վերաբերմունք է պահանջել զոհված հայերի ընտանիքներին

Ուկրաինայի հայերի միության նախագահ Վիլեն Շատվորյանը կառույցի արտահերթ նիստի ժամանակ անդրադարձել է Սլավյանսկում հայազգի Ռուբեն Ավանեսյանի մահվանն ու նշել, որ պետությունը, անկախ փաստից, թե զոհվածները քաղաքական ինչ դիրքորոշում ունեն, պետք է յուրաքանչյուր զոհի առնչությամբ համարժեք վերաբերմունք ցուցաբերի: Ինչպես հաղորդում է analitika.at.ua-ն, Շատվորյանը դիմում է պատրաստել Ուկրաինայի նախագահ Ալեքսանդր Տուրչինովին և վարչապետ Արսենի Յացենյուկին՝ խնդրանքով ցուցաբերել համարժեք վերաբերմունք ողբերգության առնչությամբ: «Մեր պարտքն է, մարդկանց հետ պահել ապօրինի գործողություններից: Իսկ այն ընտանիքները, ովքեր հարազատ են կորցրել, պետք է զգան պետության հոգատարությունը»,-ասել է Շատվորյանը: Ավելի վաղ նա հանդես էր եկել հայտարարությամբ՝ կոչ անելով համայնքի ներկայացուցիչներին սադրանքներին տեղի չտալ և չմասնակցել ապօրինի ու չար տոնված միջոցառումներին:

Շատվորյանը հայտարարել է, որ Ուկրաինայի հայերի միությունը կողմ է Սահմանադրության դրույթների և քաղաքացիների իրավունքների պահպանմանն ու դատապարտում է յուրաքանչյուր հակաօրինակ գործողություն: «Երկրում տեղի ունեցող քաղաքական գործընթացներն առաջացնում են Ուկրաինայի քաղաքացիների մտահոգությունը' անկախ նրանց ազգային պատկանելությունից: Այսօր մեր պարտքն է ամեն ինչ անել համայնքի ներսում կայունության և փոխըմբռնման պահպանման համար»,-հայտարարել է Շատվորյանը:

Ապրիլի 13-ին, նախնական տեղեկություններով, հրազենային վնասվածքից Ուկրաինայի Դոնեցկ շրջանի Սլավյանսկ քաղաքում զոհվել էր հայազգի Ռուբեն Ավանեսյանը: Ուկրաինայի հայերի միությունը միակ համաուկրաինական կազմակերպությունն է, որ միավորում է երկրում գործող բոլոր հայկական կառույցները: Ուկրաինայի հայերի միությունը Ուկրաինայի առաջին հասարակական կազմակերպություն է, որն ընդգրկվել է Եվրամիության ռեգիստրում' որպես ամենաթափանցիկ կազմակերպություն:

Ներկայումս Ուկրաինայում բնակվում է շուրջ 400 հազար հայ։ Նրանք ապրում են հիմնականում Կիևում (40 հազար), Օդեսայում, Խարկովում, Դոնեցկում, Լվովում, Զապորոժիեում, Ղրիմի քաղաքներում և այլուր։ Ուկրաինայում գործում են 23 հայկական եկեղեցի և 2 մատուռ, ամենօրյա և կիրակնօրյա դպրոցներ, հրատարակվում են «Արագած», «Մասսյաց աղավնի» հայկական թերթերը, «Սուրբ Խաչ» հանդեսը։ 2001թ. ստեղծվել է Ուկրաինայի հայերի միությունը: