Թուրքիան փորձում է օգտագործել Ուկրաինայի ճգնաժամն Ադրբեջանի ու Իրանի վրա ճնշման համար. «Կոմերսանտ»

Թուրքիան սկսել է ավելի ակտիվորեն փորձել ի նպաստ իր շահերի օգտագործել Ուկրաինայի' Ռուսաստանի և Եվրամիության հետ հակամարտությունն, ինչի համար առաջարկել է «Հարավային հոսք» գազային խողովակաշարի երթուղին փոխել այնպես, որպեսզի այն անցնի իր տարածքով: Հարցը կարող է բարձրացվել եկող շաբաթ «Գազպրոմի» վարչության փոխնախագահ Ալեքսանդր Մեդվեդևի հետ Անկարայում անցկացվելիք բանակցությունների ժամանակ: Անկարայի համար նման որոշումը կօգնեն երաշխավորել գազի մատակարարումները և ստանալ միջնորդի շահավետ դեր: Այս մասին հայտնում է «Կոմերսանտը»' նշելով, որ «Գազպրոմը» դեռևս չի հաստատում անգամ նման բանակցությունների անցկացման փաստը:

Թուրքիայի էներգետիկայի և բնական պաշարների նախարար Թաներ Յըլդըզը հայտարարել է, որ Թուրքիան պատրաստ է քննարկել «Հարավային հոսք» գազատարի ցամաքային հատվածն իր տարածքով անցկացնելու հարցը: Նա հավելել է, որ թեև Ռուսատանը դեռևս նման հարցում չի ուղղել Անկարային, այդուհանդերձ, «նման խոսակցություններ ընթանում են»: Ներկայում Ռուսաստանից Եվրոպա գազ փոխադրելու համար կառուցվող «Հարավային հոսքի» երթուղին անցնում է թուրքական տարածքային ջրերով:

Թաներ Յըլդըզի խոսքով' հաջորդ երկուշաբթի Մեդվեդևը պետք է ժամանի Անկարա, ում հետ բանակցություններում էլ կքննարկվի թուրքական կողմի առաջարկը:

Փորձագետների կարծիքով' Թաներ Յըլդըզի հայտարարությունը կարող է Թուրքիա գազի այլ մատակարարների' Ադրբեջանի և Իրանի վրա ճնշելու փորձ լինել այդ բանակցություններում: Բանն այն է, որ եթե «Հարավային հոսքն» անցնի Թուրքիայի տարածքով, ապա դա զգալիորեն կնվազեցնի Անդրանատոլիական (TANAP) և Անդրադրիատիկ (TAP) գազատարների ռազմավարական նշանակությունը, որոնք նախատեսված են ադրբեջանական գազը Եվրոպա հասցնելու համար:

«Հարավային հոսքը» կառուցվում է հենց «Նաբուկո» նախագծին հակակշիռ: Բայց, չնայած դրան, «Նաբուկոն» այդպես էլ չիրագործվեց, և նրա փոխարեն ի հայտ եկան TANAP-ն ու TAP-ը:

Եթե «Հարավային հոսքը» Թուրքիայի տարածքով անցկացնելու գաղափարն իրականանա, ապա Անկարան Եվրոպա գազի փոխադրման հարցում Ադրբեջանի և Իրանի նկատմամբ ճնշման նոր լծակներ կստանա: