Հարավային Կորեայում վթարի ենթարկված նավի զոհերի թիվն աճել է 64-ի. Renhap

Հարավային Կորեայի ափերի մոտ խորտակված «Սևոլ» նավի զոհերի թիվը հասել է 64-ի: Այս մասին հայտնում է ria.ru-ն՝ վկայակոչելով Renhap լրատվական գործակալությունը։

Ավելի վաղ հաղորդվում էր 56 զոհի մասին։ Երկրի նախագահ Պակ Կըն Հեն խստորեն քննադատել է նավի անձնակազմի գործողությունները, որոնց հետևանքով տասնյակ մարդիկ են զոհվել։ Հարավային Կորեայում ձերբակալվել էր նավի նավապետ Լի Չժուն Սոկը։ Հետաքննության տվյալներով՝ նավապետը նավի ղեկին չի եղել այն պահին, երբ այն սկսել է խորտակվել։

Անհայտ կորածների ընտանիքների անդամները, ովքեր դժգոհ են որոնողա-փրկարարական գործողության` իրենց կարծիքով, դանդաղ ընթացքից, գործադուլ են սկսել Չինդո կղզում, որը գտնվում է նավաբեկության վայրի մերձակայքում: Ինչպես տեղեկացրել է Ռյոնհապ գործակալությունը, նրանցից ոմանք փորձել են բողոքի երթ կազմակերպել Հարավային Կորեայի նախագահ Պակ Կին Հեի՝ Սեուլում գտնվող պաշտոնական նստավայրի առջև:

Հիշեցնենք, որ «Սևոլ» ուղևորատար նավն ապրիլի 16-ին խորտակվել էր երկրի հարավ-արևմտյան ափերի մոտ: Ավելի վաղ Ֆրանս Փրեսս գործակալությունը հաղորդել էր, որ նավից հաջողվել է տարհանել 174 մարդու: Նավում հիմնականում դպրոցականներ են գտնվել, ովքեր էքսկուրսիայի էին գնում ուսուցչի հետ: Ավելի վաղ ԶԼՄ-ները նշում էին, որ որոշ ուղևորներ կարող են արգելափակված լինել նավում:

Փրկարարական ու որոնողական աշխատանքներին ներգրավված են 170 նավ և 550 ջրասուզորդ: