Ղրիմի դատախազ Նատալյա Պոկլոնսկայան համացանցում ռեկորդային դիտումներ է գրանցում (տեսանյութ)

Ղրիմի դատախազ Նատալյա Պոկլոնսկայայի մասին Enjoykin «Nyash Myash» տեսահոլովակը համացանցում ձեռք է բերում այնպիսի ժողովրդականություն, որը զուգադրելի է համաշխարհային աստղերի ժողովրդականության հետ: Հինգ օրում YouTube-ում այս տեսահոլովակի դիտումների քանակը մեկ միլիոնից ավելացել է մինչև հինգ միլիոն յոթ հարյուր հազար, ինչն այն դարձրել է ամենահանրաճանաչ տեսագրությունը ռուսաստանյան տեսահոլովակների մեջ:

Այսպես, օրինակ՝ եթե համեմատենք համաշխարհային հայտնի կատարողների նոր տեսահոլովակները, ապա Լանա Դել Ռեյի «West Coast» տեսահոլովակը, որը զետեղվել է «Nyash Myash»-ից մեկ օր առաջ, ըստ YouTube-ի տվյալների՝ ապրիլի 21-ին դրությամբ հավաքել է 7 միլիոն դիտում: Մայամիից ամերիկա-կուբացի ռեպեր, երգիչ և երաժշտական պրոդյուսեր Pitbull-ն իր «Wild Wild Love» տեսահոլովակի նույն այդ 5,7 միլիոն դիտումը հավաքել է սոսկ երեք շաբաթվա ընթացքում: Ռիհաննայի և Էմինեմի «Numb» երգի տեսահոլովակը մեկ ամսում դիտել է միայն երկու միլիոնից փոքր-ինչ ավելի մարդ: 

33-ամյա Պոկլոնսկայան մարտ ամսին նշանակվել է Ղրիմի դատախազ, թերակղզի, որը հայտարարել է իր անկախության մասին և բնակիչների հանրաքվեի արդյունքներով մտել Ռուսաստանի կազմ:

Պոկլոնսկայան նվագում է դաշնամուր, սիրում է նկարել: Ամուսնալուծված է, դաստիարակում է դստերը: Նշանակումից հետո բառացիորեն մի քանի օրում քնքուշ կապուտաչյա շիկահեր կինը դարձել է Ճապոնիայի սոցիալական ցանցերի աստղը, որտեղ հայտնվել են նրա բազմաթիվ գծանկար-դիմանկարները: Այնուհետև նրա նկատմամբ սկսել են հետաքրքրություն հանդես բերել նաև այլ երկրների ինտերնետ-օգտատերերը, հաղորդել է ՌԻԱ Նովոստի գործակալությունը: