Հակոբ Հակոբյանը Սևանա լճից ջրի բացթողման ծավալն ավելացնելու կառավարության որոշումը պարտադրված է համարում

Կառավարությունը պարտադրված է գնում Սևանա լճից ջրի բացթողման ծավալն ավելացնելու քայլին: Այս մասին Ազգային ժողովում «Սևանա լճի էկոհամակարգերի պահպանման, վերաարտադրման և օգտագործման միջացառումների տարեկան ու համալիր ծրագրերը հաստատելու մասին» ՀՀ օրենքում փոփոխություններ և լրացումներ կատարելու մասին օրենքի նախագծի քննարկման ժամանակ ասաց ԱԺ սոցիալական հարցերի մշտական հանձնաժողովի նախագահ Հակոբ Հակոբյանը:

Նախագծով առաջարկվում է մինչև 2019թ. հունվարի 1-ը Սևանա լճից ջրի բացթողնման տարեկան չափաքանակ սահմանել առավելագույնը 240 մլն խմ՝ ներկայիս 170 մլն խմ-ի փոխարեն: «Մենք այսօր Արարատյան դաշտում ոռոգման ջրի լուրջ խնդիր ունենք և իրավունք չունենք Արարատյան դաշտն առանց ոռոգման ջրի թողնել»,-ասաց Հակոբյանը:

Հակոբ Հակոբյանն ընդգծեց, որ հարևան Թուրքիան էլ իր հերթին անխնա օգտագործում է Արաքս գետի ջուրը, որը միջազգային պայմանագրերով պետք է Հայաստանը և Թուրքիան հավասար օգտագործեն: «Մեր հարևանները, ոչ բարով, արդեն Արաքսի վտակների վրա կառուցում են հինգերորդ ջրամբարը, և այդ հինգ ջրամբարներով 1.5 մլրդ խմ ջուր են տանելու: Այն ջուրը, որ պետք է համատեղ օգտագործեինք, Թուրքիան մեծ մասով վերցնում է: Այստեղ լուրջ խնդիր կա, և պետք է մտածել, որ մեր ջրային ռեսուրսը կարողանանք օգտագործել մեր երկրի համար»,-նշեց Հակոբյանը: