Գյուլինգում տեղի ունեցավ հայկական խաչքարի բացման արարողությունը (լուսանկարներ)

Ապրիլի 26-ին, Դանիայում՝ դանիացի մարդասեր Կարեն Յեփփեի ծննդավայր Գյուլինգում, տեղի ունեցավ հայկական խաչքարի բացման արարողությունը: Նշենք, որ խաչքարի բացումը, որը տեղադրվեց Արմավիրի մարզպետ Աշոտ Ղահրամանյանի նախաձեռնությամբ, նվիրվում էր Հայոց ցեղասպանության 99-րդ տարելիցին: 

Բացման արարողությանը մասնակցեցին ՀՀ դեսպան Հրաչյա Աղաջանյանը, Օդերի քաղաքապետ Ուֆֆե Յենսենը, ՀՀ Արմավիրի մարզպետ Աշոտ Ղահրամանյանի գլխավորությամբ' Հայաստանից ժամանած պատվիրակությունը, Կենտրոնական Եվրոպայի և Սկանդինավիայի Հայրապետական Պատվիրակ Հոգեշնորհ Տիրան վարդապետ Պետրոսյանը, Շվեդիայի հոգևոր հովիվ և Հայրապետական պատվիրակի փոխանորդ, Հոգեշնորհ Տեր Եղիշե վարդապետ Ավետիսյանը, Գյուլինգի տեղական արխիվի տնօրեն պարոն Մոգենս Հոյմարկը, դանիացի պատմաբան-ցեղասպանագետ Մաթիաս Բյորնլունդը, քաղաքական և հասարակական գործիչներ, լրագրողներ:

Դեսպան Աղաջանյանը հանդես եկավ ելույթով ու նշեց. «Կարեն Յեփփեի և Մարիա Յակոբսենի աղոթքները և գործերը փրկեցին հարյուրավոր կյանքեր: Նրանց աղոթքները և՛այն ժամանակ, և՛ այսօր էլ իրենց մեջ ունեն հրաշքներ գործելու ներուժ: Ավելին, երկրային այդ հրեշտակներն իրենցով արդեն իսկ հրաշք են…Ամենադժվար պահերին, Կարենը և Մարիան օգնել են մարդկանց' փրկելով նրանց կյանքը: Սակայն նրանք օգնել են նաև փրկել մարդկային արժեքները և իդեալները' ընդգծելով նվիրման, հավատի և պատասխանատվության ուժը: Այս իդեալներն ու արժեքներն ի զորու են փոխել այս աշխարհը, քանի որ դրանք ճշմարիտ են:

Տասնամյակներ անց այդ հրաշքներից մեկն էլ Գյուլինգում հայոց Խաչքարի տեղադրումն է: Կարեն Յեփփեի և Մարիա Յակոբսենի աղոթքներն այսօր էլ բարձրանում են երկինք և վայր են իջնում երկիր' ամոքելու մեր սրտերը և հոգիները և ցույց տալու խաղաղության և մարդասիրության արահետը»: