Հայոց ցեղասպանության 99-րդ տարելիցին նվիրված միջոցառումներ են անցկացվել Իտալիայի մի շարք քաղաքներում

Իտալիայի մի շարք քաղաքներում անցկացվել են միջոցառումներ' նվիրված Հայոց ցեղասպանության 99-րդ տարելիցին: Ի հիշատակ Հայոց ցեղասպանության զոհերի' Իտալիայի Պեզարո քաղաքի կենտրոնական հրապարակում գտնվող «Գրադարիի» պալատում կայացել է գերմանացի գրող և իրավապաշտպան Արմին Վեգների' Հայոց ցեղասպանության օրերին արված լուսանկարների ցուցահանդեսի պաշտոնական բացման արարողությունը:

Այն կազմակերպվել էր տեղի փոքրաթիվ հայ համայնքի ջանքերով: Ցուցահանդեսի բացմանը ելույթներ են ունեցել Արմին Վեգների որդին' Միքելե Վեգները, և Իտալիայում ՀՀ դեսպանության խորհրդական Անահիտ Թովմասյանը: Միքելե Վեգները խոսել է հոր' Արմին Վեգների կյանքի ու գործունեության' Հայոց ցեղասպանության ականատեսի վկայությունների, հայ ժողովրդի իրավունքների պաշտպանությանը նրա նվիրվածության մասին, և անընդունելի է համարել Թուրքիայի կողմից Հայոց ցեղասպանության ժխտումը: Անահիտ Թովմասյանն Իտալիայում ՀՀ դեսպան Սարգիս Ղազարյանի անունից ողջունել է ցուցահանդեսի բացումը և այն կարևորել է որպես հարգանքի տուրք 99 տարի առաջ հայ ժողովրդի հանդեպ իրականացված ահավոր ոճրագործության' 20-րդ դարի առաջին ցեղասպանության զոհերի հիշատակին: Իր ելույթում նա, մասնավորապես, նկատել է, որ Թուրքիան, բազում զրկանքներ պատճառելով հայ ժողովրդին, իր ժխտողական քաղաքականությամբ այժմ էլ փորձում է հայերին զրկել հիշողության իրավունքից: Նա ընդգծել է, որ այդ քաղաքականությունը դատապարտված է ձախողման, քանի որ հայ ժողովուրդը շարունակում է ապրել և իր անկախ պետականությամբ ու սփյուռքով հաստատակամորեն հետամուտ է Հայոց ցեղասպանության միջազգային ճանաչմանն ու դատապարտմանը:

Իտալիայի Միլան քաղաքի Սուրբ Ամբրոջիո եկեղեցում Հայ Առաքելական Եկեղեցու սպասավոր հայր Թովմա Խաչատրյանի կողմից, ի հիշատակ Հայոց ցեղասպանության զոհերի, մատուցվել է պատարագ: Պատարագի սկզբին ելույթ է ունեցել Միլանում ՀՀ պատվո հյուպատոս Պետրո Քուչուկյանը: Ներկա են եղել նահանգային և քաղաքային իշխանությունների, տարբեր եկեղեցական համայնքների և հայ համայնքի ներկայացուցիչներ, Միլանում հավատարմագրված պատվո հյուպատոսներ, Իտալիայի հայ համայնքի ղեկավար, պրոֆեսոր Պայքար Սիվազլիյանը:

Ապրիլի 28-ին, Միլանի քաղաքային խորհրդի նիստի ժամանակ, որին ներկա է գտնվել Միլանում ՀՀ պատվո հյուպատոս Պետրո Քուչուկյանը, խորհրդի անդամները 1 րոպե լռությամբ հարգել են Հայոց ցեղասպանության զոհերի հիշատակը:

Իտալիայի Բարի քաղաքում տեղակայված հայկական խաչքարի մոտ, տեղի բնակիչ Ռուբեն Թիմուրյանի նախաձեռնությամբ, Մխիթարյան միաբանության հայր Գրիգորիս Սիրանյանի կողմից Հայոց ցեղասպանության զոհերի հոգեհանգստի արարողություն է կատարվել: Ներկա են եղել Բարիի քաղաքապետ Միքելե Էմիլիանոն, Բարիի և Կազամասսիմա քաղաքների բնակիչներ, տեղական իշխանությունների ներկայացուցիչներ: Այնուհետև քաղաքապետարանի դահլիճում ընթերցվել է Հայոց ցեղասպանության հիշատակման առթիվ Իտալիայում ՀՀ դեսպան Սարգիս Ղազարյանի ուղերձը, որից հետո ցուցադրվել է «Արտույտների ագարակը» ֆիլմը: