Հայաստանի միջոցով ֆրանսիական ընկերությունները կարող են մուտք գործել Մաքսային միության շուկաներ

Հայաստանում ներդրումների մեծությամբ Ֆրանսիան երկրորդ երկիրն է, և ֆրանսիական կապիտալը բավականին լայն ներկայացված է մեր երկրում: Հենց դա է պատճառը, որ հայ-ֆրանսիական գործարար համաժողովի անցկացումը ոգեւորել է թեʹ հայ, թեʹ ֆրանսիացի գործարարներին: Հատկապես աշխարհաքաղաքական վերջին զարգացումների հետ կապված, Հայաստանը նոր առաջարկություններ ունի Եվրամիությանն ու, մասնավորապես, ֆրանսիական արտադրողներին' դառնալու կամուրջ դեպի Մաքսային միություն ապրանք արտահանելու հարցում:

«Տնտեսական համաժողովի շրջանակներում մեր հիմնական խնդիրն է քննարկել, թե ինչպես կարող են ֆրանսիական ընկերությունները օգտագործել Հայաստանը' որպես հարթակ այլ երկրների շուկա մուտք գործելու համար: Խոսքը վերաբերում է Մաքսային միության երկրներին: Մենք առաջարկել ենք, որպեսզի Հայաստանի միջոցով ֆրանսիական ընկերությունները մուտք գործեն Մաքսային միության շուկաներ»,- ասաց Զարգացման հայկական գործակալության գլխավոր տնօրեն Ռոբերտ Հարությունյանը:

Ըստ նրա' 2013թ-ին Հայաստանի և Ֆրանսիայի ապրանքաշրջանառությունը կազմել է 26.1 մլն դոլար, ընդ որում' արտահանումը կազմել է 4.3 մլն դոլար, իսկ ներմուծումը' 21.8 մլն դոլար: Արտահանման փոքր ծավալները Հարությունյանը պայմանավորում է այն հանգամանքով, որ Հայաստանի համար ավանդական շուկաներ են համարվում ԱՊՀ երկրները:

«Այս համաժողովի նպատակն է նաև փորձել զարգացնել արտահանումը Հայաստանից դեպի ԵՄ երկրներ: Այս տարվա հունվարին երկարաձգվել է GSP+ համակարգը, ինչը նշանակում է, որ հայկական արտադրանքն ավելի դյուրին կարող է մտնել այդ շուկաներ: Համաժողովի շրջանակներում կքննարկենք, թե ինչպես կարող են հայկական ապրանքներն ավելի լայն ներկայացված լինել ֆրանսիական շուկայում»,- ասաց Հարությունյանը' հավելելով, որ նախատեսում են նոր ապրանքներ արտահանել Ֆրանսիա, ինչպես նաև այնտեղ ներկայացնել հայկական արտադրության գինիներն ու այլ ալկոհոլային խմիչքները: