Էրդողանի կառավարությունն ակնարկում է Իսրայելի հետ Գյուլենի կապերի մասին. ԶԼՄ-ներ

Թուրքիայի ներքին գործերի նախարար Էֆքան Ալան իշխող «Արդարություն և զարգացում» կուսակցության փակ ժողովում հայտարարել է, որ աստվածաբան Ֆեթուլլա Գյուլենի կողմնակիցները Թուրքիայի կառավարության անդամների հեռախուսազրույցների լսումը և նրանց մասին տեղեկությունների հավաքագրումը սկսել են 2009 թ. նոյեմբերին Դավոսի գագաթաժողովում Իսրայելի դեմ վարչապետ Ռեջեփ Թայիփ Էրդողանի դիվանագիտական խիստ ելույթից հետո, ինչը հետագայում դարձել էր երկու երկրների միջև դիվանագիտական կապերի խզման պատճառ: Այս մասին հայտնում են թուրքական ԶԼՄ-ները:

«Գյուլենի համայնքն սկսել է մեր մասին տեղեկություններ հավաքել Դավոսում տեղի ունեցած միջադեպից հետո», -հայտարարել է Ալան:

Արդի իսլամի գաղափարախոսության հիմնադիր Գյուլենի շարժման և Թուրքիայի կառավարության միջև հակամարտությունը բացահայտ փուլ է մտել 2013 թ. դեկտեմբերին թուրքական հասարակությունը ցնցած խոշոր կոռուպցիոն սկանդալից հետո: Այն ժամանակ Էրդողանի կառավարության երեք նախարարներ ստիպված հրաժարական տվեցին' նրանց բնակարաններում միլիոնավոր դոլար կանխիկ փող և կոռուպցիոն գործողություններին մասնակից լինելու փաստեր հայտնաբերվելու պատճառով:

Այդ խայտարառակությունը խոստովանելու փոխարեն, Էրդողանն աշխատանքից ազատել է կոռուպցիոն սկանդալը հայտնաբերած հարյուրավոր ոստիկանների և դատախազների, և հրապարակել փաստաթղթեր այն մասին, որ ոստիկանությունը լսել է 7 հազար քաղաքացիների, այդ թվում' երկրի նախագահ Աբդուլլահ Գյուլի, վարչապետի, նրանց հարազատների և մոտ շրջապատի հեռախոսային խոսակցությունները:

Էրդողանը հեռախոսազրույցների զանգվածային լսումներ նախաձեռնողներին անվանել էր «կառավարության ներսում հանցավոր խմբավորում» և նրանց մեղադրել Ֆեթուլլահ Գյուլենի «Հիզմեթ» շարժման հետ կապեր ունենալու մեջ: Որոշ ժամանակ առաջ Էրդողանը Վաշինգտոնից պահանջել էր Գյուլենին արտահանձնել ԱՄՆ-ից, որտեղ նա 1999 թվականից բնակվում է էմիգրացիայում, սակայն նրա կոչը մնացել է անպատասխան:

«Հիզմեթ Հարեքեթի» ազդեցիկ կրոնական կազմակերպության առաջնորդ Ֆեթուլլահ Գյուլենի շարժումը, որ համարվում է նաև «նուրչուլար» շարժում, արդի իսլամ քարոզող հզոր շարժում է: Այն հարյուրավոր դպրոցներ ունի աշխարհի բազմաթիվ իսլամական երկրներում, այդ թվում' Թուրքիայում: Մինչև վերջերս այն համարվել է Էրդողանի գլխավորած ԱԶԿ-ի քաղաքական հենարանը: Շարժումը քարոզում է իսլամական չափավորություն, հանդուժողականություն, միջկրոնական երկխոսություն, իսլամի և ժողովրդավարության համատեղելիություն: