Ֆրանսիացի գործարարներին ներկայացվեց հայ-իրանական երկաթուղու կառուցման ծրագիրը

ՀՀ տրանսպորտի և կապի փոխնախարար Արթուր Առաքելյանը «Ենթակառուցվածքներ և սարքավորումներ» թեմայով հայ-ֆրանսիական կլոր սեղան-քննարկման ընթացքում ֆրանսիացի գործարարներին ներկայացրեց հայ-իրանական երկաթուղու կառուցման ծրագիրը: Նա տեղեկացրեց, որ Հայաստանի և Իրանի միջև նախատեսվում է կառուցել երկու երկրները միմյանց կապող երկաթուղի: «Այդ նպատակով 2012թ. մայիսին կնքվել է պայմանագիր, որի շուրջ կատարվել են քննարկումներ նախագծման, կառուցման, ֆինանսավորման հիմնախնդիրների վերաբերյալ»,- ասաց նա:

Փոխնախարարը տեղեկացրեց, որ 2012թ. նոյեմբերին ՀՀ, ԻԻՀ և ներդրումային ընկերության միջև քննարկվել և նախապատրաստվել է փոխըմբռնման հուշագիր երկու երկրները միմյանց կապող երկաթուղու տեխնիկական հիմնավորման փաստաթղթերի պատրաստման վերաբերյալ: «Կատարված ուսումնասիրության արդյունքում նախատեսվում է շինարարություն՝ ընդհանուր 6 տարի տևողությամբ և 3.5 միլիարդ դոլար արժողությամբ: Հայաստանի տարածքով երկաթուղին կկազմի 305 կիլոմետր, պետք է ունենա 19.6 կիլոմետր երկարությամբ 86 կամուրջ»,- ասաց փոխնախարարը:

Առաքելյանն ընդգծեց, որ նշված ծրագիրը հանձնվելու է կոնցեսիոն կառավարման, ուստի ծրագիրը կարող է երկկողմանի հետաքրքրություն ներկայացնել՝ ինչպես ներդրողների՝ կոնցեսիայի մասնակից դառնալու, այնպես էլ շինարարական կազմակերպությունների և ընկերությունների համար: