Ֆրանսիացի գործարարներին ներկայացվեց Հյուսիս-հարավ ճանապարհային միջանցքի շինարարության ծրագրի ընթացքը

Հյուսիս-հարավ ճանապարհային միջանցքի ներդրումային ծրագիրը ոչ միայն Հայաստանի, տարածաշրջանի, այլ նաև միջազգային հանրության համար կարևոր ռազմավարական և տնտեսական նշանակություն ունի: Այս մասին «Սարքավորումներ և ենթակառուցվածքներ» թեմայով հայ-ֆրանսիական կլոր-սեղան քննարկման ժամանակ ասաց Հյուսիս-հարավ ճանապարհային միջանցքի ներդրումային ծրագրի գործադիր տնօրեն Արթուր Սարգսյանը: «Այս ճանապարհը գտնվում է պատմական Մետաքսի ճանապարհի կարևորագույն թևերից մեկի վրա և ըստ հնագիտական պեղումների՝ այս ճանապարհի վերականգնումը հենց Մետաքսի ճանապարհի վերականգնումն է, ուստի կառավարության կողմից որոշվեց սկսել այս աննախադեպ նշանակություն ունեցող ճանապարհի շինարարությունը»,- ասաց Սարգսյանը:

Ճանապարհի շինարարության ծախսերը կկազմեն 1.5-2 միլիարդ դոլար: «Նախատեսվում է 556 կիլոմետր ճանապարհի վերականգնում և վերակառուցում, որը կապելու է Իրանի սահմանը Վրաստանի սահմանի հետ: Ճանապարհը լինելու է առաջին կատեգորիայի 4 գծանի բետոնե ծածկույթով»,- ասաց Սարգսյանը:

Ճանապարհային միջանցքի շինարարության ֆինանսավորումն սկսվել է Ասիական Զարգացման բանկի հետ շրջանակային ֆինանսական համաձայնագրի շնորհիվ, որը նախատեսում էր նախնական 500 միլիոն ԱՄՆ դոլարի ներդրում: Ընթացքում ծրագրի համաֆինանսավորմանն են միացել Եվրոպական ներդրումային բանկը, որի հետ արդեն 60 միլիոն եվրո արժողությամբ ֆինանսավորման համաձայնագիր ունենք, և նախատեսվում է հյուսիսային հատվածի Գյումրի-Բավրա հատվածի շինարարության համար 120 միլիոն եվրոյի բանակցություններ սկսել:

Արթուր Սարգսյանը տեղեկացրեց, որ այս պահին բանակցությունները շարունակվում են Եվրասիական զարգացման բանկի հետ 150 միլիոն դոլար վարկային պայմանագրի ստորագրման ուղղությամբ, որով սկսվելու է հարավային հատվածի Աշտարակ-Քաջարան հատվածի շինարարությունը:

Սարգսյանն ուրախությամբ նկատեց, որ ծրագրի մեկնարկին Հայաստանը միջանցքի շինարարության նախագծման աշխատանքների ընթացքում համագործակցել է նաև ֆրանսիական ընկերությունների հետ: