Սոցիալական ինտեգրված կենտրոններն ամբողջական լուծում կտան քաղաքացու սոցիալական տարբեր խնդիրներին

Սոցիալական ինտեգրված կենտրոնների ներդրմամբ` քաղաքացուն հնարավորություն է տրվում մեկ կետից ստանալ տարբեր սոցիալական խնդիրների լուծումները և իրականացնել լիարժեք սպասարկում: Այս մասին լրագրողների հետ զրույցում ասաց ՀՀ աշխատանքի և սոցիալական հարցերի նախարար Արտեմ Ասատրյանը՝ նշելով, որ ծրագրից ակնկալվում է նաև ծախսարդյունավետության բարձրացում։ «Ցանկացած հարցով քաղաքացին պետք է դիմի մեկ վայր և ստանա ամբողջական սպասարկում։ Հանրապետության ամբողջ տարածքում ձևավորված 19 կենտրոններում արդեն իսկ կիրառվում է այս համակարգը: Մենք արդեն ունենք տարբեր ուսումնասիրությունների արդյունքներ, այդ թվում' անկախ փորձագիտական, որոնք փաստում եմ, որ քաղաքացիների մոտ մեծացել է դրական վերաբերմունքը մատուցվող սոցիալական ծառայությունների վերաբերյալ: Հիմա լավ առիթ է, որ մենք կարողանանք գնահատել փորձնական ծրագրի արդյունքները և քննարկենք արդեն իսկ բացված կենտրոններում առաջացած խնդիրները, որպեսզի կարողանանք վերջնական մոդելի վերաբերյալ կառավարությանը միասնական փաթեթ ներկայացնել»,- ասաց Ասատրյանը։

Նա հավելեց, որ ինտեգրման հաջորդ փուլը տեղեկատվական ինտեգրումն է, որը կապահովի տարբեր կառույցների միջև փոխգարծակցությունը և պետության կողմից մատուցվող ծառայություններն ավելի որակյալ կդարձնի։ «Բացի ֆիզիկական ինտեգրումից, պետք է ունենաք նաև տեղեկատվական ինտեգրում և միասնական հաշվառման համակարգ։ Կենսաթոշակների մասով արդեն իսկ գործում է տեղեկատվության և մոնիտորինգի համակարգը, որը ցույց է տալիս, որ օրական քաղաքացիների շուրջ 1000 դիմում է ընդունվում տարածքային կենտրոններ։ Անցկացվում է նաև մոնիթորինգ՝ պարզելու' դիմումների պատասխանի տասնօրյա ժամկետները պահպանվում են, թե ոչ»,- ասաց Ասատրյանը։ Նա նշեց, որ ներկայումս հիմնական թույլ կետը սոցիալական աշխատողի ինստիտուտն է, որը դեռ կայացման փուլում է։