ՀՀ էներգետիկայի և բնական պաշարների նախարարությունը էլեկտրաէներգիայի սակագնի բարձրացման հարց չի քննարկել

Հայաստանի Հանրապետության էներգետիկայի և բնական պաշարների նախարարությունն իր իրավասությունների շրջանակներում էլեկտրաէներգիայի սակագնի բարձրացման հարց չի քննարկել: Այս մասին Ազգային ժողովում լրագրողների հետ զրույցում նշեց ՀՀ էներգետիկայի և բնական պաշարների փոխնախարար Արեգ Գալստյանը՝ արձագանքելով ԲՀԿ խմբակցության քարտուղար Նաիրա Զոհրաբյանի հայտարարությանը, թե տեղեկություններ կան, որ առաջիկայում Հայաստանում էլեկտրաէներգիայի սակագինը կթանկանա՝ 1 կվտ/ժամ էլեկտրաէներգիայի դիմաց 38 դրամի փոխարեն դառնալով 45 դրամ: «Ես' որպես նախարարության աշխատակից, նման տեղեկատվություն չունեմ, և մեզ մոտ մեր իրավասությունների շրջանակներում նման հարց չի քննարկվել»,- ասաց Արեգ Գալստյանը:

Նա ընդգծեց, որ էլեկտրաէներգիայի սակագինը որոշում է ոչ թե էներգետիկայի և բնական պաշարների նախարարությունը, այլ հանրային ծառայությունները կարգավորող հանձնաժողովը, իսկ նախարարությունում այդ հարցի շուրջ քննարկում չի եղել:

ԲՀԿ խմբակցության քարտուղար Նաիրա Զոհրաբյանը «Էներգետիկայի մասին» ՀՀ օրենքում փոփոխություններ և լրացումներ կատարելու մասին օրենքի նախագծի քննարկման ժամանակ հայտարարեց, որ ինքը հստակ տեղեկություններ ունի, որ առաջիկայում Հայաստանում էլեկտրաէներգիայի սակագինը կրկին կթանկանա՝ խնդրելով փոխնախարարին հստակ պարզաբանում տալ: