ԱՄՆ-ի էլեկտրոնային լրտեսման ծրագրի ամենասենսացիոն մերկացումները դեռ առջևում են. Guardian-ի լրագրող

ԱՄՆ-ի հետախուզության կողմից իրագործվող էլեկտրոնային լրտեսման խոշորամասշտաբ ծրագրերի ամենասենսացիոն մերկացումների հրապարակումը դեռ առջևում է: Դա խոստացել է նման նյութերը հրապարակման պատրաստող ամերիկացի լրագրող Գլեն Գրինուոլդը: Անցյալ տարի հենց նա է սկսել այն փաստաթղթերի հրապարակումը, որոնք որոշել էր ի լուր աշխարհի հայտնել ԱՄՆ-ի Կենտրոնական հետախուզական վարչության (ԿՀՎ) ու Ազգային անվտանգության գործակալության (ԱԱԳ) նախկին աշխատակից Էդվարդ Սնոուդենը, ինչը միջազգային սկանդալ է հարուցել:

Բրիտանական Guardian թերթում Սնոուդենի փաստաթղթերի հրապարակման հետ կապված իր աշխատանքի համար Գրինուոլդը և ամերիկացի մեկ այլ լրագրող և վավերագրող-ռեժիսոր Լորա Փոյթրեսն ընթացիկ տարում ԱՄՆ-ում արաժանացել են հեղինակավոր Փուլիտցերյան մրցանակի՝ «Հասարակությանը ծառայելու համար» հանգուցային կատեգորիայում:

«Մենք աշխատում ենք այն հոդվածների վրա, որոնք, ինչպես ինձ թվում է, կլինեն ԱԱԳ-ի մասին դեռևս չհրապարակված նյութերից ամենախոշորների, եթե ոչ ամենակարևորների թվում»,- նշել է Գրինուոլդը Democracy Now անկախ հեռուստածրագրին տված հարցազրույցի ժամանակ, հաղորդել է ԻՏԱՌ-ՏԱՍՍ-ը: