Հեղինե Բիշարյանն անընդունելի է համարում պետական պահպանութան ենթակա անձանց սպասարկման ծախսերը գաղտնի պահելու գաղափարը

Ազգային ժողովի ՕԵԿ խմբակցության ղեկավար Հեղինե Բիշարյանի համար անընդունելի է օրենքի նախագիծը, որով առաջարկվում է պետական պահպանության ենթակա անձանց սպասարկման ծախսերն իրականացնել գաղտնիության պամաններում: Ազգային ժողովում «Պետական գնումների մասին» և «Պետական և ծառայողական գաղտնիքի մասին» ՀՀ օրենքներում փոփոխություններ և լրացումներ կատարելու մասին օրենսդրական փաթեթի քննարկման ժամանակ Բիշարյանը նշեց, որ այդ ծախսերը պետք է լինեն թափանցիկ, ինչպես որ միշտ եղել են: «Ես չեմ հասկանում, թե ինչի համար է սա արվում: Ի՞նչ է փոխվել: Մենք երբեք չենք կենտրոնացել մեր ղեկավար մարմինների ծախսերի վրա: Լրատվամիջոցներն են երբեմն անդրադարձել դրանց, սակայն սա նորմալ է, և չեմ կարծում, որ հիմքեր կան նման նախագիծ բերել և արտահերթ ռեժիմով քննարկել»,- ասաց Բիշարյանը:

Բիշարյանի խոսքով` Հայաստանի նման փոքր երկրում ուղղակի անընդունելի է սպասարկման ծախսերը թաքցնել: Նա ընդգծեց, որ ոչ մեկի հարգանքը ղեկավար կառույցների նկատմամբ չի նվազել նրանց արած ծախսերի համար: «Մենք դեմ ենք քվեարկելու այս նախագծին՝ համարելով, որ շատ ավելի կարևոր օրենքներ կան, որ մենք պետք է քննարկենք և ընդունենք, քան այս նախագիծը, որը չգիտես ինչու բերվել և քննարկվում է արտահերթ ռեժիմում»,- ասաց պատգամավորը:

Պատասխանելով պատգամավորին' ՀՀ ԱԺ նախագահ Գալուստ Սահակյանը նշեց, որ կառավարությունն արտահերթ նիստի օրակարգը համաձայնեցրել է իր հետ, իսկ ինքը թույլ է տվել, որպեսզի այս նախագիծը մտնի օրակարգ, քանի որ գարնանային նստաշրջանն ավելի շատ քաղաքական օրակարգ էր թելադրում, իսկ օրենսդրական նախաձեռնությունները հետ էին մնացել: