Էրդողանի` Թուրքիայի նախագահ դառնալը կարող է երազանք մնալ. անգլիական մամուլ

Անգլիական մամուլը Թուրքիայի Մանիսայի նահանգի Սոմա քաղաքի ածխահանքում տեղի ունեցած աղետի լուսաբանումներում մեծ տեղ է հատկացրել նաև այդ ողբերգության հնարավոր քաղաքական ազդեցություններին: Ինչպես հաղորդում է The Guardian թերթը, որն իր էջերից մեկն ամբողջությամբ նվիրել է Սոմայի աղետին, դրա պատճառով Թուրքիայում սկսված բողոքի ակցիաներին, հատկապես, վարչապետ Էրդողանի և նրա խորհրդական Յուսուֆ Յուրքելի կողմից երկու հանքափորների ծեծի ենթարկելու միջադեպերին, ուշադրության է հրավիրել վերջին մեկ տարվա ընթացքում թուրքական կառավարության նկատմամբ հանրության մեջ առաջացած դժգոհություններին:

Թերթը հավանական է համարում, որ Սոմայի աղետը կարող է քաղաքական հետևանքներ ունենալ Էրդողանի համար: «Անցյալ ամռանը Գեզի այգու հետ կապված բողոքի ակցիաները և Էրդողանի ընտանիքի անդամների մասնակցությամբ դեկտեմբերին բացահայտված ապօրինությունների պնդումների ու կոռուպցիոն սկանդալից հետո եկած բողոքի այս նոր ալիքը կարող է ի չիք դարձնել Էրդողանի երկրի նախագահ ընտրվելու հավանականությունը: Էրդողանի' Թուրքիայի նախագահ դառնալը կարող է նրա համար երազանք մնալ», -գրում է The Guardian-ը:

Անգլիական The Economist-ը Սոմայի աղետը ներկայացրել է «Ստորգենյա մահ. Սոմայի ողբերգությունը զգացվում է նաև քաղաքականության մեջ» վերնագրով: Հոդվածում թերթը նշում է, որ Թուրքիայի վարչապետ Էրդողանը երկրի պատմության մեջ ամենավատ արդյունաբերական վթարից հետո կանգնել է ժողովրդի ցասմանը դեմ դիմաց: «Աղետը կարող է անցյալ ամռանը երկիրը ցնցած բողոքների նման նոր ցույցերի ճանապարհ բացել: Դրանք շատ տխուր լուրեր են մարտի 30-ի տեղական ինքնակառավարման ընտրություններում տարած հաղթանակով ուրախացած և հայացքը օգոստոսին անցկացվելիք նախագահական ընտ րություններին սևեռած Էրդողանի համար», -նշում է թերթը: Սոմայի ածխահանքում աղետի հետ կապված նմանատիպ կարծիքներ են հայտնել նաև անգլիական The Independet, The Financial Times, The Times թերթերը: