Ռուսաստանը Չինաստանին գազը կվաճառի եվրոպական գնով՝ հազար խորանարդ մետրը 350-380 դոլարով. «Իզվեստիա»

Չինաստանի համար ռուսական գազի վերջնական գինը կկազմի հազար խորանարդ մետրի դիմաց 350-380 դոլար: Այդ մասին մայիսի 19-ին գրել է «Իզվեստիա» թերթը՝ հղում անելով «Գազպրոմի» աղբյուրին:

ՌԴ-ի նախագահ Վլադիմիր Պուտինը մայիսի 20-ին այցով մեկնելու է Չինաստան, որի ընթացքում, ինչպես սպասվում է, «Գազպրոմը» և չինական CNPC-ն կարող են պայմանագիր ստորագրել գազի մատակարարման վերաբերյալ:

«Հակառակ Չինաստանին էական զեղչերի վերաբերյալ արված կանխատեսումներին, վառելիքի վերջնական գինը կլինի մոտավորապես միջին եվրոպականի մակարդակին, այսինքն՝ հազար խորանարդ մետրի դիմաց 350-380 դոլար, «Իվեստիային» ասել է «Գազպրոմի» աղբյուրը»,- նշել է հրատարակությունը:

Ավելի վաղ Պուտինը ՉԺՀ-ի առաջատար ԶԼՄ-ներին տված հարցազրույցում հայտարարել է, որ Չինաստան ռուսական բնական գազի արտահանման վերաբերյալ պայմանավորվածությունները գրեթե պատրաստ են: Ավելի վաղ «Գազպրոմի» վարչության նախագահ Միլլերը հայտարարել է, որ Չինաստանին 30 տարվա ընթացքում տարեկան 38 մլրդ խորանարդ մետր գազի մատակարարման պարտավորագիրը կստորագրի այնպիսի պայմաններով, որոնք տնտեսապես ընդունելի են ռուսական կողմի համար, հաղորդել է ՌԻԱ Նովոստին: