Արթուր Ջավադյանը հակիրճ ներկայացրեց իր նախագահության տարիներին ԿԲ ձեռքբերումները

Անցած 6 տարում գնաճի նպատակադրման ռազմավարության կայացման ճանապարհին մի շարք քայլեր են իրականացվել, որոնք Ազգային ժողովում ՀՀ կենտրոնական բանկի նախագահի ընտրության քննարկման ժամանակ ներկայացրեց ԿԲ նախագահի թեկնածու Արթուր Ջավադյանը, ով վերջին 6 տարին զբաղեցրել է ԿԲ նախագահի պաշտոնը: «Առաջին հերթին ձևավորվել և կատարելագործվել է գնաճի կանխատեսման և քաղաքականության վերլուծական համակարգը, էապես բարձրացվել է դրամավարկային քաղաքականության իրականացման արդյունավետությունը, բարելավվել է գործիքակազմը, ֆինանսական համակարգը ապահովվել է բավարար իրացվելիությամբ, նվազել են շուկայական գործառնական ռիսկերը»,- ասաց նա:

Արթուր Ջավադյանը տեղեկացրեց, որ իրականացվել է դրամավարկային և հարկաբյուջետային քաղաքականությունների օպտիմալ համադրում, ինչն արտացոլվել է վերջին պետական պարտքի բանկային իրացվելիության համադրված կառավարման տեսանյունից, այնպես էլ համատեղ ծրագրերի մշակման և իրականացման հարցում:

Ներկայացնելով ֆինանսական համակարգի կայունության ապահովմանն ուղղված քայլերը' Ջավադյանն ընդգծեց, որ այդ առումով ձեռքբերում են եղել համաշխարհային ֆինանսատնտեսական ճգնաժամի հաղթահարմանը նպաստող քաղաքականության, կարգավորվող դաշտի և վերահսկողության համաշխարհային զարգացումներին համահունչ արդիականացման ու կատարելագործման, միջազգային հեղինակավոր կառույցների հետ շարունակական աշխատանքների իրականացման, տնտեսության ընդհանուր և սոցիալական բնույթի մի շարք ծրագրերի աջակցման, ինչպես նաև ֆինանսական համակարգի զարգացման և նպատակային զարգացման համար անհրաժեշտ ենթակառուցվածքների ներդրման ուղղությամբ տարված աշխատանքները: «Ֆինանսատնտեսական ճգնաժամի ընթացքում որևէ ֆինանսական ինստիտուտ չկանգնեց վճարելիության խնդրի առջև, և պետական բյուջեից ֆինանսական ինստիտուտների աջակցության ցուցաբերման անհրաժեշտություն չառաջացավ, մինչդեռ եվրոպական և ամերիկյան շատ ֆինանսական կառույցներ մեծածավալ բյուջետային միջոցներ ստացան»,- ասաց Ջավադյանը:

Ջավադյանը շնորհակալություն հայտնեց ՀՀ նախագահին վստահության և իրեն կրկին ԿԲ նախագահի պաշտոնում առաջադրելու համար՝ հավելելով, թե գիտակցում է, որ մեծ պատասխանատվություն է ստանձնում ՀՀ նախագահի, ՀՀ քաղաքացիների և ԿԲ անձնակազմի առջև:

Ազգային ժողովը քննարկում է ՀՀ կենտրոնական բանկի նախագահի ընտրության հարցը: ՀՀ նախագահ Սերժ Սարգսյանը ԿԲ նախագահի թեկնածուի պաշտոնում առաջադրել է Արթուր Ջավադյանի թեկնածությունը: