Կառավարությունը տնտեսության զարգացման հիմքում կդնի գյուղատնտեսությունն ու գործարար միջավայրի բարելավումը

Գյուղատնտեսությունն առաջնային է ՀՀ կառավարության նոր ծրագրում, որն այսօր ներկայացվելու է Ազգային ժողովին: Գյուղատնտեսությունն ունի արտադրողականության բարձրացման խնդիր, որի լուծումը կնպաստի եկամուտների վերաբաշխման բարձր աստիճանին: Այս մասին լրագրողների հետ զրույցում տեղեկացրեց ՀՀ էկոնոմիկայի նախարար Կարեն Ճշմարիտյանը` խոսելով ՀՀ կառավարության նոր ծրագրով նախատեսվող քայլերի մասին: Նա շեշտեց, որ հարկավոր է բարձրացնել փոքր տնտեսությունների մասնաբաժինը տնտեսության մեջ։

Նախարարը որպես կառավարության ծրագրի հաջորդ գերակայություն նշեց գործարար միջավայրի բարելավումը և հատկապես փոքր և միջին ձեռնարկատիրության զարգացումը։ «Նախ և առաջ պետք է բարելավել ՓՄՁ-ների դասակարգումը, քանի որ դրանց տեսակները բազմաթիվ են և խմբավորման կարիք կա։ Օրինակ կան փոքր և միջին ձեռնարկություններ, որոնք ծառայություններ են մատուցում մեծերին: Օրինակ, Ամուլսարի ծրագիրը նախատեսում է հարակից ոլորտների զարգացում ևս՝ կապված մատակարարումների, ծառայությունների մատուցման հետ։ Երկրորդ խումբը այն ՓՄՁ-ներն են, որոնք ինքնուրույն են կայանում, նրանց մի մասը առևտրի և ծառայությունների ոլորտում են, որը կազմում է մեր համախառն ներքին արդյունքի ավելի քան 40 տոկոսը»,- ասաց Ճշմարիտյանը։

Նախարարը նշեց, որ առաջնային կլինեն նաև զբոսաշրջության զարգացումն ու տեղեկատվական տեխնոլոգիաների ոլորտային աճը։ «Բաց երկնքի քաղաքականությունից ակնկալվում է 20-25 տոկոս ուղևորափոխադրումների աճ։ Դա իր ազդեցությունը կունենա զբոսաշրջության աճի վրա: Ոլորտի զարգացմանը կնպաստեն նաև նոր երթուղիների ձևավորումն ու տարածաշրջանային զբոսաշրջության զարգացումը: Հաջորդ գերակա ոլորտը տեղեկատվական տեխնոլոգիաներն են, որը երկրում դնում է գիտելիքահենք տնտեսության հիմքը՝ նպաստելով նաև այլ ոլորտների զարգացմանը»,-ասաց նախարարը։

Նրա խոսքով՝ կիրականացվեն նաև ներդրումային ծրագրեր, ինչպես օրինակ Ամուլսարի ծրագիրը, որը նախատեսում է 300-350 մլն դոլարի ներդրումներ և տարեկան 200-250 մլն դոլարի արտահանում։

Ազգային ժողովը կառավարության նոր ծրագիրը կքննարկի այսօր՝ մայիսի 20-ի նիստում: