Թուրքիայում 301 մարդու զոհվելու պատճառ դարձած Սոմայի ածխահանքի սեփականատերը պետությունն է. թուրքական մամուլ

Թուրքական մամուլում և սոցիալական ցանցերում հայտնվել է սկանդալային մի փաստաթուղթ, որով բացահայտվում է, որ Մանիսա նահանգի Սոմա քաղաքի ածխահանքի սեփականատերը, որտեղ օրերս տեղի ունեցած աղետի պատճառով 301 հանքափոր է զոհվել, թուրքական պետությունն է և ոչ թե մասնավոր անձ, ինչպես հայտարարվել էր աղետից անմիջապես հետո:

Թուրքական «Ջումհուրիեթ» թերթը հրապարակել է այդ փաստաթուղթը և հայտնել, որ ածխահանքը սեփականաշնորհված չի եղել, և աղետի ու հանքափորների մահվան համար իրական պատասխանատուն հենց իշխող «Արդարություն և զարգացում» կուսակցության (ԱԶԿ) առաջնորդ և վարչապետ Էրդողանի կառավարությունն է:

Փաստաթուղթը, որը կազմել է Թուրքիայի աշխատանքի և սոցիալական ապահովության նախարարության վերահսկողական ծառայությունը, վկայում է, որ ստուգայց է կատարվել վթարից 2 ամիս առաջ` 2014 թ. մարտին: Նախարարության եզրակացության մեջ նշված է, որ ստուգումների պահին հանքի աշխատակիցների թիվը կազմել է 2948, այդ թվում` 4 կին: Փաստաթղթում արձանագրվել է, որ հանքափորներն աշխատում են չափազանց վտանգավոր պայմաններում:

Թերթը գրում է, որ «Սոմա» բաժնետիրական ընկերության ղեկավար Ալփ Գյուրքանը, ում ներկայացնում են որպես ածխահանքի սեփականատեր, իրականում ընդամենը ենթակապալառու է և պետական հանքը շահագործել է պետության թույլտվությամբ, ուստի «կոտորածի պատասխանատուն ԱԶԿ-ն է», քանի որ վթարային վիճակում հանքի շահագործման համար մեղավորը երկրի իշխանություններն են:

«Ածխահանքը սեփականաշնորհված չի եղել: Գյուրքանի արդյունահանած ամբողջ ածուխը վաճառել է պետությունը, հետևաբար տեղի ունեցած ողբերգության համար քրեական պատասխանատվություն կրում է նաև պետությունը»,- եզրակացնում է թերթը: