Ուկրաինայի հայերի միության նախագահ Վիլեն Շատվորյանը հանդիպել է ԵԱՀԿ-ի ներկայացուցիչների հետ

Կիևում տեղի է ունեցել Ուկրաինայի հայերի միության նախագահ Վիլեն Շատվորյանի հանդիպումը ԵԱՀԿ դիտորդական առաքելության ներկայացուցիչների հետ: Հանդիպմանը մասնակցել են ԵԱՀԿ դիտորդական առաքելության անդամներ Խոսե Մարտինեսը, Կատարինա Վենցելը և Աննա Շևչենկոն: Այս մասին հայտնում է AnalitikaUA.net-ը:

Հանդիպման ընթացքում հատուկ ուշադրություն է դարձվել տիրող հասարակա-քաղաքական իրավիճակին: Քննարկվել է նաև հայկական սփյուռքին, ազգային փոքրամասնություններին և մարդու իրավունքներին վերաբերող հարցերը:

Հանդիպման ընթացքում Վիլեն Շատվորյանը նշել է, որ Ուկրաինայի հայերը ինտեգրման բարձր մակարդակի շնորհիվ ակտիվ մասնակցում են երկրի հասարակական կյանքին, ինչպես նաև ներգրավված են քաղաքական և պետական գրեթե բոլոր ոլորտներում:

Նա նաև ներկայացրել է Ուկրաինայի հայերի միության գործունեությունը, բազմաթիվ ծրագրերի իրականացման առաջընթացի, ինչպես նաև միջազգային դաշտում ծավալած գործունեությունների արդյունքների մասին:

Հիշեցնենք, 2014թ. մարտի 21-ին ԵԱՀԿ մշտական խորհուրդը հավանություն էր տվել Ուկրաինա ԵԱՀԿ դիտորդական առաքելություն ուղարկելուն և որոշում էր ընդունել 6 ամսով Ուկրաինա ուղարկել 100-500 հոգանոց դիտորդական առաքելություն: Ապրիլի 2-ի դրությամբ` առաքելության աշխատանքին մասնակցում է 63 մարդ` 30 պետությունից: