Վարվիր այնպես, ինչպես կկամենաս, որ քեզ հետ վարվեն. բաց նամակ` ՀՀ վարչապետին

«Մեծարգո Հովիկ Արգամի Աբրահամյան,

Ողջունում ենք Ձեզ, քանի որ գիտակցելով ստանձնել եք վարչապետի պատասխանատու պաշտոնը, և ձեր` պրակտիկ և անմիջական ղեկավար լինելը մեզ հույս է ներշնչում, որպեսզի դիմենք Ձեզ և ներկայացնենք գյուղատնտեսության ոլորտում տիրող չարիքներից մեկը` ՋՕԸ-ի առկայությունը, որը, հանդիսանալով միջնորդ կազմակերպություն, դարձել է գյուղատնտեսության մեջ փոքր և միջին բիզնեսի զարգացումը խոչընդոտող, ինչպես նաև գյուղաթափմանն ու արտագաղթին նպաստող գործոն:

Ինչպես հայտնի է բոլորիս, տարածաշրջանում հարևան պետությունները ոռոգման ջրի դիմաց հողօգտագործողներից գանձումներ չեն կատարում, իսկ ամբողջ աշխարհում գյուղատնտեսությունը պետության կողմից միշտ էլ օժանդակվում է և գտնվում դոտացիոն կարգավիճակում:

Իսկ ինչ է կատարվում մեզ մոտ. դեռ 2013 թվականին «Հենարան» կայքում արտացոլվել է Արագածոտնի մարզի Կոշ գյուղում գտնվող ծիրանի այգու խնդիրը` սեփականատերեր Արամ և Էմմա Երանոսյանների (համապատասխանաբար 6.5 և 3.5 հա) և «Շամիրամ» ՋՕԸ-ի կողմից իրականացվող անարդարությունների և ամենաթողության վերաբերյալ, ինչի կապակցությամբ մինչև օրս հարցին լուծում չի տրվել: Այգին գտնվում է չորացման վտանգի առջև:

Խնդիրը հասկանալու համար ներկայացնում ենք վեճի առարկան:

2003 թվականին գյուղօգտագործման չորրորդ և հինգերորդ կարգի վարելահողի վրա հիմնել ենք վերոհիշյալ ծիրանենիների այգին: Կատարվել է մելորատիվ և ագրոքիմիական հսկայական աշխատանք, իսկ 2005թ. նախկինում գյուղի միջով անցնող ոռոգման քանդված ջրագիծը վերանորոգելու նպատակով համաշխարհային բանկի ծրագրի շրջանակներում ֆինանսապես մասնակցել ենք նոր ոռոգման ջրագծի կառուցման աշխատանքներին: Տարեկան 24% վարկ վերցնելով` մարել ենք պայմանագրի ֆինանսական բոլոր ծախսերը:

Այս ամենի համար ծախսվել են հսկայական գումարներ, մարդկային ռեսուրսներ և միջոցներ: Անտեսելով այս ամենը և խախտելով սեփականտիրոջ կողմից ջրագծի նկատմամբ ձեռք բերած իրավունքները` ՋՕԸ-ի ղեկավարությունը ջուր է մատակարարում մեր կողմից անցկացված ջրագծով, համայնքի այդ ուղղությամբ գտնվող հողօգտագործողներին և ջրի գինը գանձում է ոռոգված հողակտորի հեկտարի չափով:

Մենք դեմ չենք, այլ ընդհակառակը` ուրախ ենք, որ մեր կողմից ֆինանսավորված ջրագծից օգտվում են համագյուղացիները: Սակայն բազմիցս ՋՕԸ-ին խնդրել ենք, որ մեզանից նույնպես ջրագծի վարձը գանձեն ոռոգված հեկտարի չափով: Մեզ ջուրը տալիս են Յարցևի սարքի միջոցով` լիտր/վայրկյան չափով:

Շնորհիվ վերոհիշյալ սարքի` արհեստականորեն ջրի տատանումներ առաջացնելով, խախտելով սարքի աշխատանքը` նրանք առաջացնում են ոռոգման ժամկետի երկարացում:

20 լիտր/վայրկյան մշտական ջրի ապահովման դեպքում այգին ջրվել է 4-5 օրում, սակայն 2010 թվականից սկսած այգին ջրվել է 10-15 օրվա ընթացքում: Հաճախակի ընդհատումներով ջրելու հետևանքով շարքից դուրս են եկել մեծ քանակությամբ ծառեր: Այգին փրկելու նպատակով հաճախակի վճարել ենք նրանց կողմից ներկայացված գումարները, որոնք գնալով դառնում են ֆանտաստիկ: 2013 թվականին վճարել ենք 400 000 ՀՀ դրամ, որի դիմաց այգին ջրել ենք մեկ անգամ, սակայն երկրորդ անգամ ջուրը խնդրելուց հետո մի քանի անգամ ընդհատումներով ջուրը տալով` պահանջել են մուծում կատարել, ինչից հետո դադարեցրել են ջրի մատակարարումը: Մեր խնդրանքներին, որ բերքը իրացնելուց հետո վճարենք ջրի վարձը, նրանք չեն համաձայնվել:

2013 թվականին բերքի մոտ 70 տոկոսն այգին չջրելու պատճառով կորցրել է ապրանքային տեսքը և չի իրացվել: 

Հարգարժան պարոն վարչապետ, մեր ընտանիքի եկամտի միակ աղբյուրը այգուց ստացված եկամուտն է: 

Հայցում ենք Ձեր օբյեկտիվ միջամտությունը այգին չորանալուց փրկելու համար, ինչպես նաև հնարավորության դեպքում օժանդակել մեզ վերականգնել ՋՕ-ի կողմից հասցված վնասները: Նշենք նաև, որ այս ամենին տեղյակ է նաև Կոշ համայնքի ղեկավարը:

ՋՕԸ-ի աշխատակիցները Կոշ համայնքի բնակիչներ չեն, ինչի պատճառով էլ անտարբեր վերաբերմունք են դրսևորում այս ամենի հանդեպ: Ծառերը կենդանի են և ունեն խնամքի կարիք, ինչը մենք չենք կարող իրականացնել, քանի որ հայտնվել ենք ծանր ֆինանսական վիճակում, գոյացել են ժամկետանց պարտքեր և պարտավորություններ «Արդշինինվեստ» բանկում:

Արամ Երանոսյան

Էմմա Երանոսյան

Հեռախոսահամարներ կապ հաստատելու համար` 091 467885, 093 629449»: