Անջելինա Ջոլին չի բացառել, որ ապագայում իր համար կընտրի քաղաքական գործչի կարիերան

Հոլիվուդյան դերասանուհի Անջելինա Ջոլին չի բացառում, որ ապագայում իր համար կընտրի քաղաքական գործչի կարիերան: Այդ մասին նա հայտնել է ամերիկյան ABC հեռուստաընկերության լրագրողներին տված հարցազրույցում:

Պատասխանելով այն հարցին, թե չի ծրագրում արդյոք իրեն փորձել քաղաքականության ասպարեզում, Ջոլին ասել է. «Գիտեք, եթե ես գայի այն եզրակացության, որ կկարողանամ դա արդյունավետորեն անել, ապա ես կփորձեի»: «Սակայն ես վստահություն չունեմ՝ արդյոք ինձ այդ ասպարեզում լրջորեն կընդունեն, եւ արդյոք ես կկարողանամ արդյունավետ գործունեություն ծավալել»,-խոստովանել է նա:

Ավելի վաղ Ջոլին քանիցս հայտարարել է, որ քաղաքական գործչի կարիերան իր համար խիստ անընդունելի է, քանի որ իր անցյալում չափազանց շատ են հասարակայնության տեսանկյունից անվայել մանրամասները: «Հետաքրքիր է, արդյոք արդեն հայտնի Է դարձել բոլոր այն կմախքների մասին, որոնք կան իմ պահարանում: Հավանաբար, ամեն ինչ արդեն հայտնի է, այլեւս ոչինչ չի մնացել»,-նշել է նա:

Ջոլին խոստովանել է, որ ինքը եւ դերասան Բրեդ Փիթը այդպես էլ դեռ չեն որոշել, թե երբ են հարսանիք անելու: «Մենք ամսաթիվ չենք նշանակել: Մենք ոչինչ չենք թաքցնում, պարզապես դեռ իրոք չգիտենք»,-պարզաբանել Է դերասանուհին:

Ջոլին 50 հազար դոլար է նվիրաբերել Սերբիայում ու Բոսնիայում եւ Հերցեգովինայում ավերիչ ջրհեղեղից տուժածներին օգնելու համար:

Միջոցները փոխանցվել են Կարմիր խաչի միջազգային կոմիտեի (ԿԽՄԿ) միջոցով: «Ողբերգություն է, որ տարածաշրջանը, որն այդքան հակամարտությունների ու ավերածությունների ասպարեզ է եղել, այժմ տուժել է նման մասշտաբի տարերային աղետից»,-դերասանուհու խոսքը մեջբերել Է ԿԽՄԿ-ն, հաղորդել Է ԻՏԱՌ-ՏԱՍՍ-ը: