Գանձապետի պատասխանը Նիկոլ Փաշինյանին հիշեցրեց Սևակի «Առաջադրանք բոլոր հաշվիչ մեքենաներին» բանաստեղծությունը

Ազգային ժողովի մշտական հանձնաժողովներում այսօր մեկնարկել է «Հայաստանի Հանրապետության 2013թ. պետական բյուջեի կատարման մասին» տարեկան հաշվետվության քննարկումները:

ՀԱԿ խմբակցության պատգամավոր Նիկոլ Փաշինյանի խոսքով` 2013թվականն աննախադեպ տարի էր արտաքին պարտքի համար` 861 մլն դոլար, այն դեպքում, երբ 2012-ին եղել է 139 մլն, 2011-ին` 101։

«Միանգամից այսպես կտրուկ աճ, որը բյուջեի 33 տոկոսն է կազմում, ինչքանո՞վ է նպատակահարմար նման պիկը, չարժի՞ բանակցել պարտքի սպասարկման հարցում, որ ավելի սահուն լինի։ Հարթ գրաֆիկն ավելի օգտակար չի՞ տնտեսության համար և կտրուկ վերելքները վնաս չե՞ն տնտեսությանը»,- ասաց նա և նշեց, թե պարտքի նման մի պիկ էլ սպասվում է 2020 թ-ին։

ԿԲ նախագահ Արթուր Ջավադյանը նշեց, թե 2009թ. ռուսական 500 մլն դոլար վարկը վերցնելուց հետո ընդունվել է քաղաքական որոշում՝ ռուսական վարկը սպառել 10 տարում։ «500 մլն-ով ավելացավ վարկերի սպասարկումը, մեծ տատանումը կապված է սպառման համար։ 2019-20թթ-ին իհարկե որոշակի պիկ ունենք, բայց մեր արտաքին ռեզերվների կառուցվածքը, արտաքին պահուստների կառուցվածքը համահունչ են պարտքի կառուցվածքին, թե արտարժույթի տեսակարար կշիռներում, թե ժամկետների հարցում։ Դրանք հաշվի են առնվել և բոլոր տիպի պիկերը հաշվի ենք առնում»,- նշեց նա։

Արթուր Ջավադյանը նշեց, թե 2013թ-ին ավարտելու են արտաքին ռեզերվների սպասարկման ամենաբարձր մակարդակը:

«Պատմականորեն արտաքին ռեզերվների ամենաբարձր մակարդակն ունեցել ենք 2012թ-ին»,- նշեց նա։

Հարցին անդրադաձավ նաև Ֆինանսների նախարարի տեղակալ Ատոմ Ջանջուղազյանը` կարծիք հայտնելով, թե հարցն ավելի շատ կառավարությանն է վերաբերում, քան ԿԲ-ին։

«Ինչո՞ւ է այդքան մեծ ստացվել 2013-ի պարտքի սպասարկման թիվը, այն բացատրություն ունի, որ մենք ստանձնել ենք վաղաժամ մարում, 10 տարվա ընթացքում պետք է մարել ռուսական վարկը։ Իսկ իրականացվել է մարումն ի հաշիվ մեկ այլ արտաքին պարտքի, բայց ոչ պարտքի տեսքով, այլ արտաքին շուկայում պետական պարտատոմսերի վաճառքով»,-ասաց նա։

Նիկոլ Փաշինյանն արձագանքելով նշեց, որ թե պատասխանն իրեն հիշեցրեց Պարույր Սևակի «Առաջադրանք բոլոր հաշվիչ մեքենաներին» բանաստեղծությունը։

«Փաստորեն, պարոն Ջավադյանի պատասխան ավելի հասկանալի էր։ Հասկացանք, որ կայացվել է քաղաքական որոշում և արտաքին պարտքի սպասարկման բարդությունները գցվել են 2020թ-ի վրա: Ասաց, որ եթե այսպես չանեինք, պիկը կլիներ 2014-15թթ-ը։ Եթե ճիշտ հասկացա` պետությունն առաջնորդվում է «ինձանից հետո թեկուզ ջրհեղեղ» սկզբունքով։ Չեմ կարծում, որ այսօրվա իշխանությունները կլինեն իշխանության 2020թ-ին և սրանով որոշվել է պարտքը հեռացնել, որ բարդություն չլինի»,- նշեց Փաշինյանը։

ՀՀԿ պատգամավոր Գագիկ Մինասյանը հակադարձեց, թե ճիշտ հակառակն է արվել, ոչ թե պարտքի մարումը հետ են տվել, այլ առաջ։ Իսկ Ջավադյանը բացատրեց, թե իրենք ոչ թե ավելացրել ենք բյուջեի բեռը, այլ թեթևացրել են, իսկ քաղաքական որոշում ասելով` նա նշեց, թե նկատի ուներ, որ դրանք ուղղորդվում են տնտեսական որոշումներով։