Նախագահականը ծախսել է 3 միլիարդ 967 միլիոն դրամ

Տնտեսություն 27 Մայիս, 2014 12:35

Հայաստանի Հանրապետության նախագահի աշխատակազմին 2013թ. պետական բյուջեով հատկացվել է 3 միլիարդ 993 միլիոն դրամ, ճշտված պլանը կազմել է 4 միլիարդ 074 միլիոն դրամ, ծախսը կազմել է 3 միլիարդ 967 միլիոն դրամ՝ ապահովելով նախանշված ծախսերի 97.4 կատարողական: Այս մասին Ազգային ժողովի պետաիրավական հարցերի և ֆինանսավարկային ու բյուջետային հարցերի մշտական հանձնաժողովների համատեղ նիստում ՀՀ 2013թ. պետական բյուջեի կատարողականի քննարկման ժամանակ ասաց ՀՀ Նախագահի աշխատակազմի ղեկավար Վիգեն Սարգսյանը: «Տարվա ընթացքում տնտեսվել և պետական բյուջե է վերադարձվել 106 միլիոն 337 հազար դրամ»,- ասաց նա:

Անդրադառնալով ծրագրային մասին՝ Վիգեն Սարգսյանը նշեց, որ հաշվետու ժամանակահատվածում հանրապետության նախագահի աշխատակազմի ստորաբաժանումների, պաշտոնատար անձանց հիմնական խնդիրներից մեկն է եղել մասնակցությունն օրինաստեղծ աշխատանքին, օրենքների նախագծերի իրավական, մասնագիտական, լեզվաոճական փորձաքննության ապահովումը, այնուհետև Ազգային ժողովի կողմից օրենքների ընդունումից հետո սահմանված կարգով դրանք Նախագահի ստորագրության ներկայացնելը: «Աշխատակազմի պատասխանատու աշխատողները մասնակցել են օրենքների նախագծերի քննարկումներին, ներկայացրել առաջարկություններ, կարծիքներ, դիրքորոշումներ այդ փաստաթղթերի վերաբերյալ»,- ասաց Սարգսյանը:

2013թ. նախապատրաստվել և ներկայացվել են շուրջ 230 տեղեկանքներ, եզրակացություններ: «Հաշվետու տարում հանրապետության նախագահի ստորագրմանն է ներկայացվել 228 օրենք: Հաշվետու ժամանակահատվածում փորձաքննության է ենթարկվել 130 պայմանագիր, նախապատրաստվել նույնքան տեղեկանք»,- տեղեկացրեց ՀՀ նախագահի աշխատակազմի ղեկավարը:

Մեծածավալ և լուրջ աշխատանք է պահանջվում հանրապետության Նախագահի այցերի, արտերկրից ժամանող նախագահների, բարձրաստիճան պաշտոնյաների, պատվիրակությունների ընդունելությունների նախապատրաստման համար: «2013թ. հանրապետության նախագահը կատարել է 16 պետական, պաշտոնական և աշխատանքային այց, հյուրընկալել է 2 երկրների նախագահների, ընդունել է Հայաստանում մասնավոր այցով գտնվող Արքայազն Չարլզին, 6 խորհրդարանների նախագահների, 4 վարչապետերի և փոխվարչապետերի, արտաքին գործերի 14 նախարարների, միջազգային պատվիրակությունների ղեկավարների»,- նշեց Սարգսյանը: