Թուրքական մամուլն անդրադարձել է Թուրքիայի նախագահին Հայոց ցեղասպանության տարելիցին Հայաստան հրավիրելու ՀՀ նախագահի հրավերին

Թուրքական առաջատար մամուլն անդրադարձել է Հայոց ցեղասպանության 100-ամյա տարելիցին Թուրքիայի ապագա նախագահին Հայաստան հրավիրելու ՀՀ նախագահ Սերժ Սարգսյանի հրավերին` խուսափելով հանդես գալ որևէ մեկնաբանությամբ:

Թուրքական մամուլը ՀՀ նախագահի հրավերը ներկայացրել է «Հայաստանի նախագահը Թուրքիայի այս տարի ընտրվելիք նոր նախագահին հրավիրել է մասնակցել Հայոց ցեղասպանության 100-ամյա տարելիցին նվիրված միջոցառումներին» վերնագրով: Թուրքական մամուլը նշել է, որ հայկական կողմը պահանջում է 1915 թ. իրադարձությունները ճանաչել ցեղասպանություն, իսկ Թուրքիան հայտարարում է, թե այդ ժամանակ հայերի հետ թուրքեր էլ են սպանվել:

Մասնավորապես, թուրքական T24 անկախ ինտերնետային թերթը մեջբերել է «Հայոց ցեղասպանության 100-ամյա տարելիցի հիշատակման միջոցառումների» համար կազմակերպչական խորհրդի հավաքում նախագահ Սարգսյանի արած հետևյալ արտահայտությունը: «Թեև Անկարան նախկինում չտեսնված նոր քայլեր է կատարում, սակայն, այդ քայլերն արտացոլում են Թուրքիայի հարյուրամյա ժխտողական քաղաքականությունը և կրկնում զոհին և դահճին միևնույն հարթություն բերելով, անհամեմատելի բաները համեմատելով, պատմությունը խեղաթյուրող հայտնի թուրքական դիրքորոշումով, և չնայած դրան Հայոց ցեղասպանության բազմաթիվ ապացույցների հետ առերեսվելու համար Թուրքիայի նախագահին 2013 թ. ապրիլի 24-ին պաշտոնապես հրավիրում եմ Հայաստան»:

Թուրքիայի վարչապետ Ռեջեփ Թայիփ Էրդողանը ապրիլի 23-ին հանդես էր եկել հայտարարությամբ, որում ցավակցություն էր հայտնել «20-րդ դարասկզբին կյանքերը կորցրած հայերի» թոռներին և փորձել հավասարության նշան դնել կորուստների միջև: Հայաստանն ու հայկական սփյուռքը Էդողանի այդ հայտարարությունը որակել են Հայոց ցեղասպանության իրողությունը նորովի ժխտելու փորձ և պահանջել, որպեսզի Թուրքիան 1915-1923 թթ. 1,5 մլն հայերի կոտորածները ճանաչի որպես ցեղասպանություն և փոխհատուցի մարդկության դեմ կատարած այդ ոճրագործության համար:

Օսմանյան կայսրությունում Առաջին համաշխարհային պատերազմի տարիներին իրագործված հայ բնակչության կոտորածներն անվանում են Հայոց ցեղասպանություն: Այդ կոտորածներն իրագործվեցին երիտթուրքական կառավարության կողմից Օսմանյան կայսրության տարբեր շրջաններում: