Սերգո Կարապետյանը ներկայացրեց գյուղատնտեսության նախարարության առաջնահերթությունները

Գյուղատնտնեսության ոլորտում տարիների ընթացքում արձանագրվել են դրական տեղաշարժեր, սակայն այն բազմաճյուղ ոլորտ է, և դեռևս շատ խնդիրներ կան լուծելու: Այս մասին Ազգային ժողովում ՀՀ 2013թ. պետական բյուջեի կատարողականի քննարկման ժամանակ ասաց ՀՀ գյուղատնտեսության նախարար Սերգո Կարապետյանը: «Տարիներ շարունակ ոլորտում կուտակվել են խնդիրներ, որոնք լուծում են պահանջում»,- ասաց նախարարը:

Նախարարն այս առումով առանձնացրեց հողային ռեսուրսների արդյունավետ օգտագործման անհրաժեշտությունը, որը նույնպես առաջնային է համարվում: «Հայաստանի նման փոքր երկրի համար շռայլություն է, որ երկրի հողային ռեսուրսների 22 տոկոսը չի օգտագործվում»,- ասաց նա՝ ընդգծելով, որ վերջին երեք տարում շրջանառության մեջ է դրվել 35 հազար հեկտար հող, ինչը կարելի է լուրջ ձեռքբերում համարել:

Գյուղատնտեսության նախարարության համար շարունակում է լուրջ խնդիր մնալ գյուղացիական տնտեսությունների չափերի փոքրությունը, ինչի արդյունքում հնարավոր չի լինում երկրում արդյունաբերական գյուղատնտեսություն ստեղծել: «Մենք հատկապես օրգանական գյուղատնտեսական զարգացման, արտահանման ծավալների կտրուկ ավելացման հնարավորություն ունենք, որովհետև գիտեք, որ մեր բնակլիմայական պայմաները թույլ են տալիս մեծ ծավալների պտուղ-բանջարեղեն արտադրել և արտահանել հատկապես Ռուսաստան՝ Մաքսային միությանն անդամակցելուց հետո»,- նշեց նախարարը:

Նախարարության համար լուրջ խնդիր է մնում բնակլիմայական ռիսկերի նվազեցումը, որովհետև ամեն տարի երկրի գյուղատնտեսությունը լուրջ վնասներ է կրում կարկտահարությունից և ցրտահարությունից: «Մենք այս տարվա կառավարության նոր ծրագրում ընդգրկել ենք ապահովագրական համակարգի աստիճանական ներդրման նախադրյալների ստեղծումը մեր երկրում, և այդ ուղղությամբ մեծ աշխատանք է տարվելու: Որոշակի աշխատանքներ այս ուղղությամբ արդեն կատարվել են: Մենք Ֆրանսիայի գյուղնախարարության հետ ընդունված համաձայնագրի արդյունքում մեր երկրում պետք է տեղայնացնենք այդ երկրի փորձը»,- ասաց Կարապետյանը:

Շարունակվելու են աշխատանքները երկրում գյուղատնտեսական կոոպերատիվների ստեղծման ուղղությամբ: Նախարարն ընդգծեց, որ մեր երկրի գյուղատնտեսության ապագան այդ կազմակերպվող կոոպերացիայի մեջ է: Նախարարի խոսքով` եթե առաջիկա 10 տարում չհաջողվի լուծել այս խնդիրը` գյուղատնտեսությունը կշարունակի մնալ նույն մակարդակին, որովհետև այս պահին կա 340 հազար փոքր գյուղացիական տնտեսություն, որոնց միջոցով հնարավոր չի լինում արդյունաբերական գյուղատնտեսություն ստեղծել: «Բացի այդ, տվյալ մանր տնտեսությունները չեն կարողանում իրենց փոքր հողակտորով ապահովել իրենց ընտանիքի անհրաժեշտ եկամուտները, և միշտ բողոքներ կան: Մենք արդեն մի քանի եվրոպական երկրների հետ աշխատում ենք այդ ուղղությամբ, հիմքերը կան և մինչև տարվա վերջ մենք պետք է կոոպերացիայի մասին օրենքը ներկայացնենք Ազգային ժողով»,- նշեց նախարարը՝ հավելելով, որ դա նախադրյալներ է ստեղծելու, որպեսզի նախարարությունը մեծ արդյունավետությամբ շարունակի իր աշխատանքները:

Նախարարը նշեց, որ վերը նշված խնդիրները մեծ կարևորություն ունեն, քանի որ դրանց լուծմանն ուղղված քրտնաջան աշխատանքի շնորհիվ է, որ հաջողվել է գյուղատնտեսության ոլորտում դրական տեղաշարժեր արձանագրել: