Ինչո՞ւ խանութներում կաթը չի էժանանում. Գյուղնախարարի պարզաբանումը

Ամռան ամիսներին գյուղացիներից մթերվող կաթի գնի նվազմամբ պայմանավորված` խանութներում վաճառվող կաթնամթերքի գնի նվազում չի կարող լինել: Այս մասին Ազգային ժողովում ՀՀ 2013թ. պետական բյուջեի քննարկման ժամանակ ասաց ՀՀ գյուղատնտեսության նախարար Սերգո Կարապետյանը` պատասխանելով ԲՀԿ խմբակցության պատգամավոր Արմեն Ավետիսյանի հարցին, թե ինչո՞ւ ամռան ամիսներին կաթնամթերքը չի էժանանում` պայմանավորված նրանով, որ մթերվող կաթի գինը ամռանը նվազում է 20-30 տոկոսով: «Եթե այդպես լինի, կստացվի, որ ամռանը պետք է էժանացնեն, ձմեռը թանկացնե՞ն: Այդպես չի լինում: Արտադրողներն ամբողջ տարվա համար են հաշվարկ անում, չեն կարող գները տատանվել»,- պարզաբանեց նախարարը:

Սերգո Կարապետյանը բացատրեց նաև, թե ինչու է ամռանը կաթի մթերման գինն էժանանում: Նրա խոսքով` ամռան ամիսներին կաթի արտադրության պիկ է առաջանում, որի հետևանքով կաթի յուղայնությունը պակասում է, գինն էլ իջնում, իսկ ձմռանը հակառակ պրոցեսն է տեղի ունենում:

Նախարարը նշեց, որ մտադիր են ստեղծել կաթ արտադրողների միություն, իսկ կաթ վերամշակողների միություն արդեն կա: Այս միությունները, նախարարի խոսքով, միմյանց հետ կաշխատեն պայմանագրային հարաբերություններով:

Անդրադառնալով պատգամավորի դիտարկմանը, թե կաթ վերամշակողների մոտ գերշահույթներ են լինում՝ նախարարը նշեց, որ նման բան չկա, քանի որ ՏՄՊՊՀ-ն էլ բավականին լուրջ ուսումնասիրություն է անցկացրել, ստուգումներ, որի արդյունքում պարզել է, որ ոչ մի գերշահույթ էլ չկա: