«Սևանից ջրառի ավելացումը լճին վնաս չի բերում». Անդրանիկ Անդրեասյան

Այս տարի Սևանից ոռոգման նպատակով արդեն բաց է թողնվել 60 մլն խմ ջուր: Ազգային ժողովում ՀՀ 2013թ. պետական բյուջեի կատարողականի քննարկման ժամանակ այս մասին տեղեկացրեց Ջրային տնտեսության պետական կոմիտեի նախագահ Անդրանիկ Անդրեասյանը: «Սևանից ջրառի քանակության ավելացումը պայմանավորված էր նրանով, որ տարին սակավաջուր է»,- ասաց նա:

ԲՀԿ խմբակցության պատգամավոր Լյովա Խաչատրյանը չհամաձայնեց այս պարզաբանման հետ՝ ընդգծելով, որ տարին այնքան էլ սակավաջուր չէ, քանի որ անձրևներն այս տարի պարբերաբար շարունակում են տեղալ, իսկ ձմռանը ձյան նորմալ շերտ է եղել: Պատգամավորը նշեց, որ միգուցե պատճառը Արարատյան դաշտավայրի արտեզյան ավազանի հետ կապված խնդիրն է ու այն, որ գետերի վրա փոքր ՀԷԿ-եր են կառուցվել:

«Երբ ես սակավաջրության մասին խոսում եմ, մեր համակարգի տեսանկյունից եմ խոսում: Ոռոգման համակարգերն ունեն ավանդական աղբյուրներ, այդ աղբյուրների ջուրը սակավ է համեմատած մյուս տարիների հետ»,- պարզաբանեց Անդրանիկ Անդրեասյանը:

Նա նշեց, որ Հրազդան, Արաքս գետերն այս տարի քիչ ջուր են բերել, Ազատի ջրամբարը 70 մլն խմ ջուր կարող է տեղավորել, բայց լցված է 47 մլն-ով»,- հայտարարեց Անդրեասյանը:

Նա նաև նշեց, որ Սևանից ջրառի ավելացումը վնաս չի բերում լճին, այս տարեսկզբի համեմատ լճի մակարդակն ավելի է 35-36 սմ-ով: «Խոսակցությունները, թե Սևանը կործանում ենք, իրականության հետ որևէ կապ չունեն»,- ասաց Անդրեասյանը: