Բենզինը մայիսին թանկացել է, դիզելային վառելիքը` փոքր-ինչ էժանացել

Ոչ պարենային ապրանքների շուկայում 2014թ. մայիսին ապրիլի համեմատ գրանցվել է 0.3 գնաճ, ինչը հիմնականում անձնապիտո ապրանքների` 0.3 տոկոս, կոշկեղենի` 0.4 տոկոս, դեղամիջոցների` 0.4 տոկոս, կահույքի՝ 0.5 տոկոս, հագուստի և գործվածքի` 0.6 տոկոս, խոհանոցային սպասքի` 0.8 տոկոս, կենցաղային էլեկտրաապրանքների 1.1 տոկոս գնաճի արդյունք է:

2014թ. մայիսին ապրիլի համեմատ հանրապետությունում գրանցվել է բենզինի 1.7 տոկոս գնաճ և դիզելային վառելիքի 0.1 տոկոս գնանկում: 2014թ. մայիսին 2013թ. մայիսի համեմատ բենզինի և դիզելային վառելիքի գները նվազել են համապատասխանաբար 3.8 տոկոս և 3.1 տոկոսով, իսկ 2013թ. դեկտեմբերի համեմատ` 2.2 և 1.9 տոկոսով:

Տեքստիլեղենի գները նշված ժամանակահատվածում աճել են 0.1 տոկոսով, գորգեղենինը` 0.2 տոկոսով, շինանյութերինը` 0.2 տոկոսով: Միաժամանակ, հանրապետությունում գրանցվել է մշակույթի ապրանքների` 4.8 տոկոս, գրենական պիտույքների` 0.5 տոկոս, վառելիքի` 0.4 տոկոս, լվացող միջոցների` 0.4 տոկոս, ոսկերչական` 0.2 տոկոս, այգեգործական` 0.1 տոկոս, գեղահարդարման ապրանքների 0.1 տոկոս գնանկում:

Հանրապետության դիտարկված 8 քաղաքներում 2014թ. մայիսին ապրիլի համեմատ արձանագրվել է ոչ պարենային ապրանքների 0.2-1.3 տոկոս գնաճ, մեկում` 0.1 տոկոս գնանկում, իսկ մյուս 2-ում պահպանվել է գների նախորդ ամսվա մակարդակը: Մայրաքաղաքում ոչ պարենային ապրանքների գների ընդհանուր մակարդակը նախորդ ամսվա համեմատ մնացել է անփոփոխ: