Պետական մարմինների բյուջեի կատարողականը 100 տոկոսից շեղվել է տնտեսումների հաշվին

ՀՀ Ազգային ժողովի մշտական հանձնաժողովների համատեղ նիստում շարունակվում են ՀՀ 2013թ. պետական բյուջեի կատարողականի քննարկումները: ՀՀ ֆինանսների նախարարի տեղակալ, գլխավոր գանձապետ Ատոմ Ջանջուղազյանը ներկայացրեց մի շարք նախարարությունների ու պետական այլ մարմինների բյուջեի կատարողականը: «Էկոնոմիկայի նախարարությունը հաշվետու տարում բյուջետային դասակարգման հինգ բաժիններով 20 ծրագրերի կատարման պատասխանատու է եղել, որի համար նախատեսված է եղել 5 միլիարդ 984 միլիոն դրամ' ներառյալ կառավարության պահուստային ֆոնդից նախատեսված միջոցների օգտագործումը: Արդյունքում արձանագրվել է 63.4 տոկոս կատարողական, որը պայմանավորված է արտաքին աջակցությամբ իրականացվող ծրագրային ցուցանիշից էական շեղման հանգամանքով: Այստեղ կուզենայի շեշտել, որ ներքին աղբյուրների հաշվին ֆինանսավորվող ծրագրերն իրականացվել են 100 տոկոսին մոտ չափերով»,- հայտնեց Ատոմ Ջանջուղազյանը:

Նրա խոսքով' Էներգետիկայի և բնական պաշարների նախարարությունը հաշվետու տարում բյուջետային դասակարգման երեք բաժիններում իրականացել է 11 ծրագիր'70.2 միլիարդ դրամ նախատեսված միջոցներով: «Այդ ծրագրերի համար հատկացումներ են եղել նաև կառավարության պահուստային ֆոնդից: Արձանագրվել է 91.2 տոկոս կատարողական: Էներգետիկայի և բնական պաշարների նախարարության դեպքում նույնպես արտաքին աջակցության որոշակի ծրագրեր են նախատեսված եղել' 6 միլիարդ դրամի չափով, որի դիմաց կատարողականը ցածր է եղել' կազմելով 6.25 տոկոս: Ներքին աղբյուրների հաշվին նախատեսված ծրագրերի մասով հիմնական շեղումները ծրագրերից արձանագրվել են աշխատակազմի պահպանման մասով, որոնք բացատրում են տնտեսումներով և «Սոցիալական փաթեթի ապահովում» ծրագրով, որը նույնպես բացատրվում է տնտեսումներով»,- հայտնեց Ատոմ Ջանջուղազյանը:

Նրա հաղորդմամբ' Քաղաքաշինության նախարարությունն էլ բյուջետային դասարկարգման վեց բաժիններում իրականացրել է 15 ծրագիր, կատարողականը կազմել է 98.6 տոկոս' կամ փաստացի օգտագործվել է 7.5 միլիարդ դրամ:

«Տրանսպորտի և կապի նախարարությունը երեք բաժիններում 21 ծրագրի համար է պատասխատու եղել, կառավարության պահուստային ֆոնդից ևս օգատագործվել են միջոցներ: Ընդհանուր առմամբ' կատարողականն այս նախարարության համար 43.9 տոկոս է կազմել, այդ դեպքում ևս այս նախարարության կողմից իրականացվող ծրագրերի մեջ էական տեսակարար կշիռ են կազմել արտաքին աջակցությամբ իրականացվող ծրագրերը. շուրջ 62.5 միլիարդ դրամից, որից 51.6 միլիարդ դրամը նախատեսված է արտաքին աջակցությամբ իրականացվող ծրագրերի համար, որի կատարողականը կազում է 32.4 տոկոս»,- հայտնեց ՀՀ գլխավոր գանձապետը' հավելելով, որ Տրանսպորտի ու կապի նախարության ներքին աղբյուրների հաշվին իրականացվող ծրագրերի համար գրանցվել է 98.5 տոկոս կատարողական:

Հանրային ծառայությունները կարգավորող հանձնաժողովին հատկացվել է 538.5 միլիոն դրամ, կատարողականը կազմել է 95.5 տոկոս: «Այս կատարողականի շեղման երկու բացատրություն կա, առաջինը պահպանման ծախսերի մասով նախատեսվածից ավելի փոքր միջոցներ օգտագործելն է, ինչը բացատրվոմ է տնտեսումների հանգամանքով: «Սոցիալական փաթեթի ապահովում» ծրագրով նախատեսված միջոցները ևս օգտագործվել են նախատեսվածից քիչ չափով»,-հայտնեց Ատոմ Ջանջուղազյանը:

Տնտեսական մրցակացության պաշտպանության պետական հանձնաժողովի համար նախատեսված է եղել 278.8 միլիոն դրամ, կատարողականը' 99.4 տոկոս, շեղումը, հիմնականում, բացատրվում է սոցիալական փաթեթի 84.3 կատարողականով:

Կառավարությանն առընթեր անշարժ գույքի պետական կադաստրին հատկացվել է 4.4 միլիարդ դրամ, արձանագրվել է 88.2 տոկոս կատարողական, բյուջետային դասակարգման երեք բաժիններում նախատեսված են չորս ծրագրեր: Կառավարության պահուստային ֆոնդից ևս միջոցներ են հատկացվել:

«Ամփոփելով` կուզենայի նշել, որ ներքին աղբյուրների օգտագործման միջոցների մասով բոլոր պարտավորությունների դիմաց վճարումները կատարվել են ամբողջությամբ ու ժամանակին: Արտաքին աղբյուրներով իրականացվող ծրագրերի միջոցների անբավարարությամբ պայմանավորված ոչ մի ծրագիր չի հետաձգվել»,- եզրափակեց Ատոմ Ջանջուղազյանը: