Կարեն Ճշմարիտյանը ՓՄՁ ԶԱԿ-ի քաղաքականության փոփոխության անհրաժեշտություն է տեսնում

Փոքր ու միջին ոլորտի ձեռնարկությունների թվում չկա մեկը, որը, ՓՄՁ ԶԱԿ-ի շահառու լինելով, դադարեցնի իր գործունեությունը: Ազգային ժողովում բյուջեի կատարողականի քննարկման ժամանակ հայտնեց Փոքր ու Միջին ձեռնարկատիրության զարգացման ազգային կենտրոնի հոգաբարձուների խորհրդի անդամ, ԱԺ փոխխոսնակ Հերմինե Նաղդալյանը: «ՓՄՁ ԶԱԿ-ի ծրագրերի հաշվետվողականությունը ցույց է տալիս, որ մենք չունենք այն երևույթը, որ որևէ սուբյեկտ, որը աջակցություն է ստացել, դադարեցնի իր գործունեությունը: Անգամ մեկ օրինակ չունենք: Ուրիշ խնդիր կա, հնարավոր է, քիչ է սուբյեկտների թիվը, որը ծրագրի հնարավորություններից է գալիս: Վիճակագրությունն անընդհատ վարվում է, ու այդ խնդիրներն ուշադրության կենտրոնում են: Մանրածախը չի վերաբերում ՓՄՁ ԶԱԿ-ի նպատակներին, մանրածախ սուբյելտների փակվելն ուղղակիորեն չի կարելի կապել ՓՄՁ-ի գործունեության հետ»,- հայտնեց Հերմինե Նաղդալյանը:

Էկոնոմիայի նախարար Կարեն Ճշմարիտյանի խոսքով էլ' ՓՄՁ ԶԱԿ-ի աջակցման ձևերի, դրա քաղաքականության փոփոխության անհրաժեշտություն կա, որ այն ավելի արդյունավետ աշխատի: «Մարզերում ու սուբյեկտների մոտ տեղեկացվածության բարձրացումն է կարևոր և մարզային կենտրոնների ավելի ակտիվացումը: Ես չեմ կարծում, որ Երևանում, որտեղ գրավադրման գույքը լուրջ արժեք ունի, պետք է կիրառել այն գործիքը, որ վերաբերում է գրավադրման երաշխիքներին: Սա պետք է ուղղվի միայն մարզերին ու հատկապես հեռավոր ու սահմանամերձ շրջաններին ու այնտեղ նոր գործիքներ պետք է կիրառել, որ ավելի արդյունավետ գործի աջակման ծրագիրը»,- հայտեց նախարարը: