«Հացամթերքի բիզնեսը հարկման դաշտ բերելը գնաճի չի բերի». Ֆինանսների նախարարի տեղակալ

Հացամթերքի գնաճ չի նախատեսվում` կապված ստվերային տնտեսություններին հարկման դաշտ բերելու հետ: Այս մասին Ազգային ժողովում լրագրողների հետ զրույցում հայտնեց ՀՀ ֆինանսների նախարարի տեղակալ Արմեն Ալավերդյանը` հավելելով, որ այս ոլորտի փոքր բիզնեսին հարկման դաշտ բերելու գործողություններ չեն իրականացվի: «Հացամթերք արտադրողների հետ հանդիպել ենք, ներկայացրել ենք խնդիրները, որոնք են` գների ոչ ճիշտ ներկայացնելն ու ցուցանիշների համատարած թերհայտարարագրումը: Մենք շատ լավ գիտենք` Հայաստանում քանի հաց արտադրող կա, հազարավոր արտադրողներից իրական փոքր բիզնեսի հետ բացարձակապես գործ չենք ունենալու, աշխատանքը տարվելու է միջին ու խոշոր հացարտադրողների հետ, ովքեր ցույց են տալիս շրջանառություններ, որոնք իրականության հետ ոչ մի կապ չունեն»,- ասաց Արմեն Ալավերդյանը` նշելով, որ աստիճանաբար պետք է հասնեն ստվերի վերացմանը, որ գնաճ չլինի: «Եթե աստիճանաբար գնանք, գների բարձացում չի լինի, եթե կտրուկ քայլեր անենք, հնարավոր է` առանձին գնաճ լինի: Ստվերային բոլոր ոլորտներում շահութաբերությունն այնպիսին է, որ եթե անգամ մեկ-երկու տոկոսը զիջեն` գնաճի վրա չպետք է այն անդրադառնա»,- հավելեց ֆինանսների նախարարի տեղակալը: