Առողջարանային տուրիզմ, ՏՏ ոլորտ, հանքարդյունաբերություն. արաբ գործարարներին հետաքրքրող ոլորտներ Հայաստանում

Հայ և արաբ գործարարները Հայաստանում քննարկում ենք համագործակցության հետագա ծրագրերն ու փոխադարձ ներդրումային հնարավորությունները: ՀՀ առևտրաարդյունաբերական պալատում ընթացքի մեջ է Արաբական Միացյալ Էմիրությունների մայրաքաղաք Աբու Դաբիի Առևտրի պալատի պատվիրակության և հայ գործարարների համատեղ բիզնես ֆորումը:

ՀՀ առևտրաարդյունաբերական պալատի նախագահ, ԱԺ պատգամավոր Մարտին Սարգսյանը, բացման խոսքում շեշտեց հայ-արաբական հարաբերությունների կարևորությունը` ներկայացնելով երկու երկրների միջև հետագա գործարար համագործակցության մոտեցումները: «Հայաստանը մոտ ժամանակներս պատրաստվում է միանալ Ռուսաստանի, Բելառուսի և Ղազախստանի կողմից ստեղծված Մաքսային միությանը և այդ դեպքում Հայաստանում արտադրված ապրանքը կարող է ազատորեն մուտք գործել այդ երկրների շուկաներ, որը գործարաների համար լավ հնարավորություններ ստեղծել, որից, կարծում եմ, մեր երկու երկրները պետք է օգտվեն»,-ասաց Մարտին Սարգսյանը:

Նրա խոսքով` երկու պալատների կողմից համատեղ ընկերության հիմնադրումը կարևոր քայլ կլինի: «Առաջարկում ենք Հայաստանի և ԱՄԷ-ի առևտրաարդյունաբերական պալատների կողմից ստեղծել համատեղ ձեռնարկություն, որը կհամակարգի հետագա տնտեսական հարաբերությունները մեր երկու երկրների միջև»,-ասաց ՀՀ առևտրաարդյունաբերական պալատի նախագահը:

Խոսելով համագործակցության մի քանի ոլորտների մասին` Մարտին Սարգսյանը հայտնեց, որ Հայաստանում դեռևս չօգտագործված մեծ ներուժ ունի գուղատնտեսության ոլորտը: «Այստեղ շեշտը հատկապես պետք է դնել էկոլոգիական մթերքների վրա, որպես իրացման շուկա կարող է լինել ոչ միայն ԱՄԷ-ն, այլև միջազգային շուկան: Բացի այդ` արաբ զբոսաշրջիկների համար հետաքրքրություն կարող է ներկայացնել առողջարանային, ստորտային տուրիզմը, այդ թվում` ձիրաշավային վազքը և էթնիկ տուրիզմը, իսկ ներդումային առումով` ոլորտի ենթակառուցվածքների ստեղծման ու զարգացման ուղղությունը,-ասաց Մարտին Սարգսյանը` հավելելով, որ Հայաստանի առողջավայրերը պատրաստ են համագործակցության և գոյություն ունեն մի շարք ներդրումային ծրագրեր:

«Հայաստանը մեր գործընկների համար հետաքրքրական կարող է լինել տեղեկատվական ոլորտում, որը նույնիսկ ճգնաժամին, կայուն աճ է ապահովոււմ: Հաջորդ ոլորտը հանքարդյունաբերությունն է, մետաղական և ոչ մետաղականան, ընդ որում` ոչ միայն արդյունաբերությունը, այլև վերամշակումը»,-նշեց Մարտին Սարգսյանը` հույս հայտնելով, որ ընթացիկ բիզնես-ֆորումը կտա նշանակալի արդյունքներ:

Աբու Դաբիի ներդրումային հիմնադրամի գործադիր տնօրեն Խալիֆա Ալի Մոհամեդ Ալ Քամզիի ներկայացմամբ` Արաբական Միացյալ Էմիրություններն ամեն ինչ անում են զարգացնելու հարաբերությունները երկու երկրների միջև` հատկապես ներդրումային ոլորտում: «Նախկինում երկրները պայմանագիր են կնքել, որպեսզի զարգացնեն առևտրային հարաբերությունները: Մենք հասկանում ենք, որ Հայաստանում ներդրումային ընդարձակ մթնոլորտ կա, հատկապես գյուղատնտեսության ասպարեզում, արդյունաբերության, տեխոլոգիաների, տրանսպորտի ու շինարարության ոլորտներում»,-ասաց Աբու Դաբիի ներդրումային հիմնադրամի գործադիր տնօրենը: Նրա խոսքով` Աբու Դաբիում պետք է բացվի սրահ, որ կցուցադրի հայկական արտադրանքը:

ՀՀ էկոնոմիկայի նախարարի տեղակալ Տիգրան Հարությունյանն էլ նշեց, որ Հայաստանի ու Արաբական Միացյալ Էմիրությունների միջև առկա է թե հին, թե նոր հարաբերությունների պատմություն: «Նոր հարաբերությունները սկսվել են առևտրի ոլորտում, երբ 90-ականների սկզբին Հայաստանը պատերազմում էր ու շրջափակման մեջ էր, դեպի Արաբական Էմիրություններ միակ չվերթը, այսպես ասած, կյանքի ճանապարհ էր դարձել Հայաստանի համար: Առաջին անհրաժեշտության պարագաները, որոնք կարևոր էին մեզ համար, բերվում էին բեռնատար ինքնաթիռներով Արաբական Էմիրություններից»,-ասաց Տիգրան Հարությունյանը` ավելացնելով, որ Հայաստանի անկախության ճանապարհին երկու երկրների միջև հարաբերությունները ևս զարգացել են: «Արաբական Էմիրությունները մնացել են որպես առևտրային ռազմավարական գործընկեր»,-փաստեց էկոնոմիկայի փոխնախարարը` կարևորելով արաբ ներդրողների դերն աշխարհում:

Փոխնախարարը շեշտեց, որ բիզնես հիմնադրելու տեսանկյունից Հայաստանը բավականին բարենպաստ է` վկայալոչելով Համաշխարհային բանկի կողմից իրականացվող ամենամյա «Doing Business» հեղինակավոր հետազոտության արդյունքները, որտեղ Հայաստանը գտնվում է 36-րդ տեղում: «Այդ ռեյտինգում Հայաստանն այս տարի գտնվել է 36-րդ տեղում` մեկ տեղով զիջելով Բելգիային և մեկ տեղով առաջ լինելով Ֆրանսիայից»,-նշեց Տիգրան Հարությունյանը:

«Հաշվի առնելով մեր դարավոր բարեկամական կապը` սխալ կլիներ չօգտվել այդ հնարավորություններից, երբ Հայաստանը ունի ներդրումային մեծ պոտենցիալ: Այսօր Աբու Դաբիի պատվիրակությունը հյուրընկալվեց վարչպետին, ով ևս մեկ անգամ հաստատեց, որ Հայաստանը բաց է ներդրումների առաջ և յուրաքանչյուր ներդրում կլինի կառավարության ուշադրության ներքո ու կստանա մեծ աջակցություն: Երբ երկիրը տալիս է այդ մակարդակի երաշխիք, դա շատ կարևոր է ներդրողի համար»,-հավելեց Տիգրան Հարությունյանը:

Հայաստանի և Աբու Դաբիի առևտրաարդյունաբերական պալատների նախագահների կողմից ստորագրվեց Փոխըմբռնման հուշագիր: