Համաշխարհային բանկը ներկայացրեց Հայաստանի հանքարդյունաբերությանը վերաբերող երկու ուսումնասիրություն

Հայաստանում առկա են ռազմավարական կարևորություն ունեցող բազմաթիվ օգտակար հանածոներ, հատկապես համաշխարհային շուկաներում բարձր պահանջարկ ունեցող պղինձ և մոլիբդեն: Այս մասին Համաշխարհային բանկի Տեխնիկական աջակցության ծրագրի շրջանակում կազմակեպված զեկույցի ներկայացման ժամանակ ասաց ՀԲ բնապահպանության առաջատար մասնագետ Ադրիանա Դամինովան: Նրա խոսքով` Հայաստանի ազգային տնտեսության համար հանքային ռեսուրսները կարևոր գործոն են, և ոլորտը հսկայական ներուժ ունի օտարերկրյա ներդրումներ ներգրավելու և տնտեսության կայուն զարգացմանը նպաստելու համար:

«Հանքարդյունաբերության ոլորտը Հայաստանի տնտեսության շարժիչ ուժերից է: Բնապահպանության նախարարության տվյալների համաձայն` բնական ռեսուրսների ընդհանուր արժեքը Հայաստանում կազմում է 120 մլրդ դոլարից ավելի: Օտարերկրյա ուղղակի ներդրումները հանքարդյունաբերության ոլորտում տարեցտարի աճ են գրանցում: Ոլորտը մեծ նշանակություն ունի արտահանման մեջ, որոշ տարիների դա կազմել է արտահանման ավելի քան 40 տոկոսը: Սակայն հանքարդյունաբերությունը պետք է զուգորդվի կոնկրետ միջոցառումներով, քանի որ ոլորտը ազդեցություն ունի շրջակա միջավայրի վրա: Դրան են նվիրված Համաշխարհային բանկի երկու ուսումնասիրությունները»,- ասաց Դամինովան:

Ներկայացնելով համաշխարհային բանկի մասնագետների կողմից պատրաստված երկու զեկույցները` Դամինովան նշեց, որ դրանց նպատակն է ոլորտի բնապահպանական և սոցիալական խնդիրների գործնական դիտարկումը, արդի միտումների նկարագրությունը և իրավիճակի բացահայտումը: «Առաջին զեկույցը վերաբերում է Հայաստանին հանքարդյունաբերության ոլորտում կայուն և ռազմավարական որոշումների կայացմանը: Այնտեղ անդրադարձ կա հանքարդյունաբերության ոլորտի սոցիալական ծախսերին, օգուտներին, ոլորտի սոցիալական ազդեցությանը: Երկրորդ զեկույցը հանքարդյունաբերության ոլորտի բնապահպանական և սոցիալական կայունության բարելավման մասին է, որտեղ փորձ է արվում արմատավորվել բնապահպանական և սոցիալական կայունության սկզբունքները»,- ասաց Դամինովան: Նա նշեց, որ հանքարդյունաբերության ոլորտում օգտակար հանածոների կորզման աշխատանքները պետք է ուղեկցվեն այնպիսի վճռորոշ միջոցառումներով, որոնք կապահովեն սոցիալական և բնապահպանական առումով կայուն տնտեսական աճը:

Զեկույցը պարունակում է նաև առաջարկություններ, որտեղ մասնավորապես անդրադարձ կա ոլորտի ռազմավարական պլանավորմանը, իրավական դաշտի կարգավորմանը, ոլորտի թափանցիկությանը, ուղենիշների մշակմանը, պոչամբարների ռեգիստրի մշակմանը և այլն: