Գյումրիում բնակարանաշինության ծրագրի դադարի վերաբերյալ վերջնական որոշում դեռ չի կայացվել. Սուքիաս Ավետիսյան

Գյումրիում բնակարանաշինության ծրագրի դադարի վերաբերյալ վերջնական որոշում դեռ չի կայացվել: Այս մասին տեղեկացրեց ԱԺ պատգամավոր Սուքիաս Ավետիսյանը՝ անդրադառնալով Գյումրիում բնակարանաշինական ծրագրին: Ի դեպ, վերջին օրերին տեղական որոշ լրատվամիջոցներ տեղեկացրել էին բնակարանաշինական ծրագրի դադարի մասին՝ հիմնվելով «Շիրակ կենտրոն» հասարակական կազմակերպության նախագահ Վահան Թումասյանի հայտարարության վրա, ըստ որի ՀՀ քաղաքաշինության նախարարությունից իրեն բանավոր տեղեկացրել էին, որ պետական բնակարանաշինական ծրագիրը Գյումրիում հետաձգվում է: Խոսքը 430 բնակարանի մասին է: «Այսօր բնակարանաշինության հետ կապված վերջնական որոշում չկա, հակասական խոսակցություններ են: Հիմա նախ քննարկվում է բնակարանաշինությունը շարունակելու նպատակահարմարության հարցը, բայց դա չի նշանակում, թե անօթևանների խնդիրը չի քննարկվելու: Միգուցե նաև առաջիկայու մ որոշվի, որ պետք է ոչ թե բնակարանաշինությունը շարունակել' անօթևանների խնդրի լուծման համար, այլ այդ խնդիրը լուծել բնակարանային գնման վկայականների միջոցով: Հիմա դա ՀՀ կառավարությունում քննարկվում է և, երբ կառավարությունը վերջնական լուծում ունենա, մենք ազգաբնակչությանը տեղյակ կպահենք: Այս պահին հարցի վերջնական պատասխանը դեռ չկա»,- նշեց Սուքիաս Ավետիսյանը` վստահեցնելով, որ Ախուրյանում անպայման ավարտին կհասցվի բնակարանաշինական ծրագիրը:

Գյումրիում անօթևանության խնդիրը բնակարանի գնման վկայագիր ծրագրով լուծելու տարբերակին դեմ, իսկ բնակարանաշինությանը կողմ է մարզը ներկայացնող մեկ այլ պատգամավոր' Մարտուն Գրիգորյանը, ով լրագրողների հետ ունեցած հանդիպման ժամանակ նշեց, որ դա ընդունելի տարբերակ չէ: «Ես ինքս այդ գաղափարին դեմ եմ: Տարիների ընթացքում տեսել եմ, որ վկայագիրը լավագույն տարբերակը չէ և չի լուծում խնդիրը: Մարդիկ վաճառում են բնակարանները, իսկ դա նպաստում է արտագաղթին: Ես կողմ եմ բնակարանաշինությանը, թեև նաև գիտեմ, որ նորակառույց շատ բնակարաններ դատարկ են»,- ավելացրեց Մարտուն Գրիգորյանը: