Թուրքիան Ֆաթուլլահ Գյուլենի հետևից էմիսար է ուղարկել ԱՄՆ. ԶԼՄ-ներ

Թուրքիայի արտաքին գործերի նախարարության խորհրդական Ֆիրուդին Հադի Սինիրիօղլուն եռօրյա այցով մեկնել է ԱՄՆ, որի ընթացքում քննարկվելու է Փենսիլվանիայի նահանգում բնակվող նուրսիստների առաջնորդ Ֆեթուլլահ Գյուլենին թուրքական կողմին արտահանձնելու հարցը, ով Թուրքիայում անցնում է կառավարության կողմից բարձրացված «զուգահեռ պետություն» քրեական գործով: Այս մասին հայտնում են թուրքական ԶԼՄ-ները:

Նշվում է, որ Թուրքիայի ԱԳՆ խորհրդականը կհանդիպի ԱՄՆ ազգային անվտանգության խորհրդի պաշտոնական անձանց հետ, կքննարկի երկկողմանի հարաբերությունների, տարածաշրջանային և գլոբալ համագործակցության հարցեր:

Դեկտեմբերի կեսերին Թուրքիան ցնցած կոռուպցիոն սկանդալից հետո, որով բացահայտվել էր թուրքական կառավարության անդամների, այդ թվում' վարչապետի, նրա որդու, փեսայի և դստեր խոշոր կոռուպցիոն գործարքները, վարչապետ Ռեջեփ Թայիփ Էրդողանը հայտարարել էր, որ դրա հետևում կանգնած են իր կողմից «զուգահեռ պետություն» անվանված գյուլենական համայնքի հետևորդները, որոնք ցանկանում են տապալել իր կառավարությունը:

«Հիզմեթ Հարեքեթի» ազդեցիկ կրոնական կազմակերպության առաջնորդ Ֆեթուլլահ Գյուլենի շարժումը, որը համարվում է նաև նուրսիստների (նուրչուլար) շարժում, արդի իսլամ քարոզող հզոր շարժում է: Գյուլենական շարժումը քարոզում է իսլամական չափավորություն, հանդուրժողականություն, միջկրոնական երկխոսություն, իսլամի և ժողովրդավարության համատեղելիություն: Գյուլենի համայնքը Թուրքիայում, Ադրբեջանում և մի շարք այլ երկրներում ունի դպրոցներ, թերթեր, ֆինանսական կառույցներ, հասարակական կազմակերպություններ: