ՀՀ 2013թ. պետբյուջեն կատարվել է 71.5 մլրդ դրամ պակասուրդով

Հայաստանի Հանրապետության 2013թ. պետական բյուջեն կատարվել է 71.5 մլրդ դրամ պակասուրդով' կազմելով ճշտված ծրագրով նախատեսված 184.4 մլրդ դրամի 38.8%-ը: Այս մասին Ազգային ժողովում հայտարարեց ՀՀ ֆինանսների փոխնախարար, ՀՀ գլխավոր գանձապետ Ատոմ Ջանջուղազյանը: «Շեղումը հիմնականում պայմանավորված է արտաքին աջակցությամբ իրականացվող ծրագրերի կատարման հետ կապված` վարկային միջոցները պակաս ստանալու հանգամանքով, ինչպես նաև ներքին միջոցների հաշվին իրականացվող ծախսերի կատարողականով, որի արդյունքում պետական բյուջեի ներքին աղբյուրներում ելքերի ֆինանսավորմանն ուղղվող 2013 թվականի տարեսկզբի ազատ միջոցներից նախատեսված 10.6 մլրդ դրամ օգտագործելու փոխարեն այն ավելացել է 24.7 մլրդ դրամով»,- ասաց նա:

2012 թվականին ՀՀ պետական բյուջեն կատարվել էր 59.9 մլրդ դրամ պակասուրդով, այսինքն' 2012 թվականի համեմատ պակասուրդի մեծությունն աճել է 19.4%-ով: Պակասուրդ/ՀՆԱ ցուցանիշը 2013 թվականին կազմել է 1.7%' կանխատեսված 2.6%-ի և 2012 թվականի 1.5%-ի դիմաց: «Հաշվետու տարվա ընթացքում պակասուրդի ֆինանսավորման ներքին աղբյուրները կազմել են 10.9 մլրդ դրամ` նախատեսված 19.2 մլրդ դրամի դիմաց: Նախորդ տարի նշված ցուցանիշը կազմել էր 5.9 մլրդ դրամ»,- ասաց Ջանջուղազյանը:

Ազգային ժողովը քննարկում է ՀՀ 2013թ. պետական բյուջեի կատարողականի հաշվետվությունը: 2013թ. պետբյուջեի կատարողականի նախագիծն ավելի վաղ քննարկվել էր ԱԺ մշտական հանձնաժողովների համատեղ նիստում, իսկ այնուհետև` բոլոր հանձնաժողովներում առանձին-առանձին: