Հայ-ռուսական միջխորհրդարանական հանձնաժողովը կարևորում է երկու երկրների միջև տնտեսական կապերի խորացումը

Հայ-ռուսական համագործակցության միջխորհրդարանական համագործակցության հանձնաժողովի համար կարևոր խնդիր է երկու երկրների միջև փոքր և միջին բիզնեսի համագործակցության ընդլայնումը: Այս մասին Ազգային ժողովում հանձնաժողովի հայկական պատվիրակության ասուլիսի ընթացքում տեղեկացրեց պատվիրակության ղեկավար, ԱԺ փոխնախագահ Հերմինե Նաղդալյանը: «Մենք այս հարցը կարևորում էինք դեռևս այն ժամանակ, երբ չկային Ռուսաստանի հետ ինտեգրացիոն գործընթացի մասին խոսակցությունները: Իսկ ահա սեպտեմբերի 3-ից հետո այս հարցն առավել կարևոր է դարձել մեզ համար: Մենք պետք է աշխատանքներ տանենք երկու երկրների միջև տնտեսական համագործակցության ընդլայնման ուղղությամբ»,- ասաց Նաղդալյանը:

Նաղդալյանն ընդգծեց, որ Նիժնի Նովգորոդում հանձնաժողովի վերջին նիստի ընթացքում պայմանավորվածություն է ձեռք բերվել երկու երկներում ստեղծել աշխատանքային խմբեր, որոնք կուսումնասիրեն երկրների միջև տնտեսական համագործակցությունը, կփորձեն վեր հանել խնդիրները և համագործակցության ընդլայնման հնարավորությունները, իսկ աշնանը հանձնաժողովի հերթական նիստի ընթացքում կներկայացնեն իրենց ուսումնասիրության արդյունքները և առաջարկները: «Մեզ համար կարևոր է նաև, որպեսզի այդ համագործակցությունը լինի Ռուսաստանի և Հայաստանի մարզերի միջև: Այդ առումով մենք կարևորում ենք այն հանգամանքը, որ հանձնաժողովի նիստերն անցկացվում են Ռուսաստանի տարբեր մարզերում, դրանց ընթացքում մենք հնարավորություն ենք ստանում կապ հաստատել մարզերի ղեկավարների հետ, ինչպես նաև ականջալուր լինել հայկական համայնքի խնդիրներին»,- ասաց ԱԺ փոխնախագահը:

Հայ-ռուսական համագործակցության միջխորհրդարանական հանձնաժողովի աշխատանքներին ակտիվորեն սկսել են մասնակցել նաև Ազգային ժողովի ոչ իշխանական ուժերի ներկայացուցիչները: Հերմինե Նաղդալյանը դրական է գնահատում նաև այս հանգամանքը՝ ընդգծելով, որ ողջունելի է, երբ նախկինում հանձնաժողովի աշխատանքների ընթացքում պասիվություն դրսևորող ոչ իշխանական ուժերը վերջին նիստի ընթացքում ակտիվորեն մասնակցել են քննարկումերին և բանավեճերին: