Հայ միգրանտների կարգավիճակը հավասարեցված է ԵՏՄ մասնակից երկրների միգրանտների կարգավիճակին

Հայկական պատվիրակությունը հայ-ռուսական միջխորհրդարանական հանձնաժողովի վերջին նիստի ընթացքում անդրադարձ է կատարել նաև միգրացիոն խնդիրներին: Այս մասին Ազգային ժողովում կայացած ասուլիսի ընթացքում տեղեկացրեց հայ-ռուսական համագործակցության միջխորհրդարանական հանձնաժողովի հայկական պատվիրակության նախագահ, ՀՀ ԱԺ փոխնախագահ Հերմինե Նաղդալյանը: «Մենք այդ հարցը բարձրացրել ենք նաև Ռուսաստանի Դաշնության Պետդումայի առաջին փոխխոսնակ Իվան Մելնիկովի հետ հանդիպման ժամանակ, տեղեկատվություն ենք տվել իրավիճակի մասին և ստացել ենք նաև իրենց տրամադրած տեղեկատվությունը»,- ասաց Նաղդալյանը:

ԱԺ փոխնախագահը հիշեցրեց, որ Ազգային ժողովում բացված հայ-ռուսական բարեկամության ակումբի նախավերջին հանդիպմանը մասնակցել է նաև Ռուսաստանի Դաշնային միգրացիոն ծառայության ղեկավար Կոնստանտին Ռամադանովսկին: «Մենք նրա հետ բազմակողմանի քննարկել ենք Ռուսաստանի հայկական համայնքի հետ կապված բազմաթիվ միգրացիոն խնդիրներ: Այդ քննարկումներին մասնակցել են նաև մեր լիազոր մարմնի ներկայացուցիչները, մասնավորապես, Գագիկ Եգանյանը, և կետ առ կետ քննարկում է ընթացել բոլոր խնդիրների վերաբերյալ, որոնց արդյունքում մենք ունեցել ենք Ռուսաստանի Դաշնային միգրացիոն ծառայության պետի շատ պատրաստակամ վերաբերմունքը առկա խնդիրները լուծելու վերաբերյալ»,- ասաց Նաղդալյանը:

Նա հիշեցրեց, որ հայ միգրանտների համար խնդիրներն ստեղծվել են այս տարվա հունվարի 1-ից, երբ Ռուսաստանի Դաշնությունն ընդունեց վարչական օրենսգիրքը, որից բխում էր, որ խախտումներ ունեցող անձինք պատժամիջոցների կենթարկվեն ՌԴ մուտքի և ելքի ժամանակ: «Այդ խնդիրն ընդհանուր առմամբ վերաբերվում է շուրջ 800 հազար մարդու, որոնցից 34 հազարը հայեր են: Սակայն նաև մենք ունենք տեղեկատվություն այն մասին, որ շուրջ 170 հազար հայեր ռիսկի գոտում են, այսինքն՝ նրանց նկատմամբ դեռևս պատժամիջոցներ չեն կիրառվել, սակայն նրանք ռիսկի տակ են»,- ասաց Նաղդալյանը:

ԱԺ փոխնախագահը հիշեցրեց, որ Ազգային ժողովում կայացած հանդիպման ընթացքում ՌԴ Դաշնային միգրացիոն ծառայության պետը հավաստիացրել է, որ, սկսած ապրիլի 1-ից, այլևս որևէ հայի նկատմամբ այդպիսի որոշում չի կայացվում ներքին պայմանավորվածությունների հիման վրա: «Մեր բարձրացրած հարցն այն մասին, որ 34 հազար հայերի նկատմամբ համապատասխան պատժամիջոցներ են կիրառվել, Ռամադանովսկին խոստացել է, որ նրանց վերաբերյալ մոտ ժամանակներում ներողամիտ վերաբերմունք լինի, այսինքն՝ չավելանան նորերը, իսկ հների խնդիրները լուծվեն»,- ասաց նա:

Նաղդալյանն ընդգծեց, որ երկկողմ համաձայնության արդյունքում վերջին աշխատանքներն են կատարվում վերը նշված խնդիրները լուծելու համար: Նա ընդգծեց, որ առկա համաձայնագրերով սահմանված է, որ հայ միգրանտների վերաբերյալ որոշակի արտոնություններ են սահմանվում, իսկ ևս մեկ համաձայնագրերով փորձ է արվում հայ միգրանտների կարգավիճակը բարձրացնել և հասցնել արդեն ինտեգրացիոն գործընթացներին մասնակցող երկրների միգրանտների կարգավիճակին: «Թեև Ռուսաստանի ներկայացուցիչները ասում էին, որ քիչ ժամանակ է մնացել, որ Հայաստանը պետք է մտնի Եվրասիական տնտեսական միության մեջ և արդեն իրավական դաշտում այս խնդիրը լուծված կլինի, սակայն միևնույն ժամանակ իրենք հաղորդ մնացին մեր խնդրանքին, որ այդ խնդիրը շուտ լուծվի և չկապվի այն հարցի հետ, թե Հայաստանը երբ կստորագրի Եվրասիական տնտեսական միության անդամակցության պայմանագիրը»,- ասաց ԱԺ փոխնախագահը:

ՌԴ Դաշնային միգրացիոն ծառայության պետը հիմնավորել է, որ հայ միգրանտների կարգավիճակը հավասարեցված է ԵՏՄ ինտեգրացիոն գործընթացների մասնակից երկրների միգրանտների կարգավիճակին: «Միգրացիոն խնդիրները և′ հայ-ռուսական խորհրդարանական հանձնաժողովի, և′ հայ-ռուսական կառավարական հանձնաժողովի և երկու երկրների միգրացիոն ծառայությունների ուշադրության կենտրոնում են»,- ասաց Նաղդալյանը: